Премиерот Христијан Мицкоски ќе ги образложи причините за владината реконструкција, а пратениците ќе одлучуваат за повеќе кадровски промени во извршната власт
Собранието денеска ќе ја одржи 112. седница, на чиј дневен ред како централна точка е реконструкцијата на Владата. Пратениците ќе расправаат за предлозите за разрешување на повеќе министри и заменици-министри, како и за избор на нивните наследници.
Според предложените кадровски промени, од функцијата министер за правда треба да биде разрешен Игор Филков, а за нов министер е предложен Јетон Шасивари.
Промени се предлагаат и во Министерството за односи меѓу заедниците, каде што Иван Стоилковиќ треба да биде разрешен, по што е предвидено да ја преземе функцијата министер за локална самоуправа. Од оваа функција, пак, ќе биде разрешен Златко Перински, кој се очекува да биде именуван за директор на Фондот за здравствено осигурување.
За нов министер за здравство е предложен Сашо Клековски, кој треба да го наследи Азир Алиу, додека Агон Ферати е кандидат за министер за односи меѓу заедниците.
Во Министерството за земјоделство, шумарство и водостопанство се предлага Цветан Трипуновски да биде разрешен, а на негово место да биде избран Борче Серафимовски. Во Министерството за социјална политика, демографија и млади, наместо Фатмир Лимани, за министер е предложен Ѓоко Велковски.
Кадровски промени се предвидени и во Министерството за култура и туризам, каде што се предлага разрешување на Зоран Љутков, а функцијата да ја преземе Седат Сулејмани. За министер без ресор, наместо Шабан Салиу, е предложен Ерџан Демир.
Се очекува претседателот на Владата, Христијан Мицкоски, пред пратениците да ги образложи причините за реконструкцијата, која беше најавувана во изминатиот период.
Согласно собранискиот Деловник, по секој предлог за разрешување се отвора расправа што може да трае најмногу два дена. Министрите за кои е поднесен предлог за разрешување имаат право на обраќање во траење до 15 минути. За избор на новите министри е потребно мнозинство гласови од вкупниот број пратеници.
