Македонска Нација
Средбата на Рубин Земон од СДС со Виктор Стојанов, првиот човек на бугарската „Фондација Македонија“ и еден од најгласните негирачи на македонскиот идентитет, предизвика силни реакции во јавноста и дополнително ја отвори дебатата за односот на СДС кон бугарските позиции кон Македонија.
Фотографиите од софиското кафе меѓу Земон и Стојанов се појавија во период кога лидерот на СДС, Венко Филипче, секојдневно ја турка тезата дека Бугарите мора да бидат внесени во Уставот. Токму затоа, во јавноста се поставуваат прашања дали станува збор за изолиран случај или за поширока политичка линија која оди во насока на прифаќање на бугарските барања.
Дополнителен револт предизвикува фактот што Виктор Стојанов е познат по своите анти-македонски ставови и активности, а во Македонија му беше изречена и забрана за влез. И покрај тоа, Земон седна на иста маса со човек кој отворено го негира македонскиот национален идентитет, јазик и историја.
Ова не е првпат Рубин Земон да биде во центарот на контроверзии. Претходно тој даде и навредлива изјава за Гоце Делчев, тврдејќи дека „ништо не напишал во животот“ и дека „не извојувал ниедна битка“, додавајќи дека во Македонија бил создаден мит околу неговата личност. По бурните реакции, Земон изјави дека бил погрешно разбран и се извини, но новата средба со Стојанов повторно ги отвори сомнежите околу неговите ставови и политички позиции.
По скандалот, Венко Филипче изјави дека станувало збор за „ненамерни пропусти“, додавајќи дека оставката на Земон ја смета за „морален чин“. „Човекот едноставно не сака да прави терет на партијата кој што ниту го заслужуваме, ниту пак има некоја суштинска врска и работа со тие состаноци“, изјави Филипче.
Сепак, во јавноста останува дилемата дали ваквите средби и изјави се навистина случајни или претставуваат уште една потврда за блискоста на дел од раководството на СДС со политиките што доаѓаат од Софија.
