Во СДС, очигледно, секој што ќе каже дека партијата оди во погрешна насока веднаш добива етикета: купен од Мицкоски, саботер, рушител, човек однадвор. Таква е новата логика на партијата која сè уште не сака да се соочи со сопствениот пораз, со сопствените грешки и со сопственото внатрешно распаѓање.
По Игор Ивановски – Шема и Славјанка Петровска, на удар се најде и Андреј Петров. Богданка, Јон и кругот околу Венко Филипче распалија по довчерашниот сопартиец, човек кој во повеќе наврати бил висок функционер на СДС.
Најмногу ги разлути тоа што Петров кај Васко Ефтов јавно проговори за карактерот на Венко Филипче и рече дека „не вреди да се преговара со него бидејќи не го исполнува она што ќе се договори“.
Наместо да одговорат суштински, од СДС повторно ја активираа старата матрица: секој што мисли поинаку, работи за Мицкоски. Така било со Шема, така било со Славјанка, така било со Шилегов, така било со Деспотовски, така било и со Петар Арсовски. Списокот е предолг.
Прашањето е едноставно: ако некој не сака СДС да пропадне, дали тоа автоматски значи дека е купен од Мицкоски?
Во оваа превртена СДС логика излегува дека Христијан Мицкоски е виновен затоа што некои луѓе во СДС сакаат партијата да преживее. Значи, според нив, Мицкоски не сакал СДС да пропаѓа? Премногу е, дури и за СДС.
Особено симптоматична е реакцијата во која Петров се обвинува дека сака да ја „спаси СДС“. Па од кого да ја спаси? Од Мицкоски или од оние што ја доведоа партијата до оваа состојба?
Од СДС велат дека Андреј Петров не бил никаков реформатор. Претходно, Шема го нарекоа саботер. Славјанка беше нападната затоа што проговори. Секој различен став се третира како предавство, а секоја критика како надворешен заговор.
Но вистината е многу поедноставна. СДС не пропаѓа затоа што Мицкоски ја напаѓа. СДС пропаѓа затоа што не сака да се погледне во огледало. Затоа што секој внатрешен глас го доживува како непријател. Затоа што наместо демократија, нуди дисциплина; наместо реформи, нуди пресметки; наместо одговорност, бара виновници надвор од себе.
Ако Андреј Петров, Игор Ивановски, Славјанка Петровска, Шилегов, Деспотовски и уште многу други се проблемот, тогаш можеби проблемот не е во нив. Можеби проблемот е во Филипче и раководството кое не поднесува поинакво мислење.
И колку повеќе се обидуваат секој критичар да го прогласат за човек на Мицкоски, толку повеќе покажуваат дека вистинската криза не е надвор од СДС, туку длабоко внатре во СДС.
