СДС и Венко Филипче во едни соопштенија упатуваат обвинувања кон ВМРО-ДПМНЕ за србофилство, а во други за бугарофилство, додека во исто време, како што наведуваат од партијата, Зоран Заев и Венко Филипче поседуваат документи за престој и златни визи од Дубаи.
Од ВМРО-ДПМНЕ велат дека Венко Филипче е „сервилен слуга“ на Зоран Заев, а дека Заев ја ставил СДС „под кирија на Румен Радев“. Во соопштението се посочува дека постоеле сведоштва од Бугарија според кои Заев добивал пари од Софија, а за возврат ветувал прислушувани разговори и други бизнис-зделки уште пред да стане премиер.
Според ВМРО-ДПМНЕ, постои сомнеж дека Софија била користена за перење на криминално стекнат капитал, поради што, како што тврдат, Заев бил уценет и сега работел во интерес на Бугарија.
„Притисоците од СДС за прифаќање на бугарските диктати не се ништо друго освен одработување на уценетите предавници и котиња, Заев и Филипче. Овие уценети котиња сакаат сега да ја фрлат Македонија на колена со нови предавства“, се наведува во соопштението.
Од ВМРО-ДПМНЕ додаваат дека токму затоа на СДС им пречи партијата и порачуваат дека ВМРО-ДПМНЕ ќе продолжи да биде „брана за предавничките политики на Заев и Филипче“.
