Водата од гостиварскиот водовод повторно е безбедна за пиење, соопштија надлежните по седницата на Главниот штаб за управување со кризи.
Директорот на Агенцијата за храна и ветеринарство, Оливер Миланов, информираше дека забраната е укината и дека граѓаните повторно можат да ја користат водата за пиење и за приготвување храна.
Сепак, на жителите им се препорачува пред употреба добро да ја истечат водата од чешмите.
Забраната за пиење беше воведена на 17 јули по утврденото загадување на градскиот водовод. На 19 јули беше прогласена епидемија, а два дена подоцна Владата прогласи 30-дневна кризна состојба на територијата на Општина Гостивар.
Од 27 јули водата можеше да се користи само како техничка, односно за одржување на личната и домашната хигиена, но не и за пиење и готвење.
Со најновата одлука, донесена врз основа на извршените испитувања и процените на надлежните институции, водата повторно е дозволена за целосна употреба.
