Настанот „Силно светнал ден“, организиран по повод 35 години од независноста, испрати порака на заедништво, национална самодоверба и почит кон македонската државност. Граѓаните ја препознаа таа порака, додека Венко Филипче и неколкумината околу него повторно се обидуваат да оцрнат проект што ги истакнува македонската историја и национална самобитност.
Тоа веќе не изненадува. Станува збор за политичари што опстојуваат преку поделби, негирање и потценување на сè што носи македонски предзнак. Наместо да придонесат за обединување на државата, тие, како политички лешинари, се обидуваат да соберат ситни поени дури и од темите што ги поврзуваат граѓаните.
На СДС сега му пречат и македонското сонце и уметничката инсталација во која знамето од Кутлеш се претопува во денешното македонско знаме со осум зраци.
Последна што може да зборува за наводно понижување на државата е СДС — партијата на „бришачите на шахти“, под чие владеење беа променети името на државата, Уставот, името на автопатот и аеродромот, како и други државни обележја и симболи.
Со каков кредибилитет нејзините лидери денес зборуваат за достоинство, откако со години ја распродаваа македонската историја и ги поткопуваа темелите на државата? Јавноста сè уште очекува одговори и за бројните афери и обвинувања поврзани со станови во Дубаи, фирми во Бугарија и јахти во Грција.
СДС е партијата што го избриша АСНОМ од уставната преамбула и овозможи да се наметнуваат тези дека Македонија постои дури од 1944 година и дека Македонците пред тоа биле Бугари. Затоа денешните обвинувања на оваа партија за наводно понижување на државата звучат крајно лицемерно.
Ќе бидат потребни години за да се поправи политичката, националната и општествената штета што СДС со децении ѝ ја нанесува на Македонија. Но едно е сигурно: Македонија ќе продолжи напред, без оглед на оние на кои им пречат нејзиното знаме, нејзината историја и нејзината независност.
