Во издание на „Матица Македонска“ од Скопје, деновиве излезе од печат сликовницата „Патувањето на Дедо Мраз“ од Жаклина Михајлова. Првата свечена промоција во присуство, оваа интересна книга ја имаше деновиве во Сиднеј, Австралија, каде што авторката живее.
Сликовницата е оригинално дело, стихуван текст, двојазичен, на македонски и англиски јазик.
Текстот е дидактички и е наменет за помали , но и за поголеми деца. Стилот и јазикот се исто така интересни за проучување. Концептот е патувањето на Дедо Мраз од Лапонија, преку Австралија, низ Македонија и понатаму. Сликовницата е информативна, забавна и дидактичка. Мудрите учители можат да најдат низа интересни аспекти за предавање низ оваа сликовница. Заправо напишана е според најсовремени светски методи за учење и специјално, за читање.
„Ова е наша прва соработка со Госпоѓата Михајлова“, изјави Директорот на „Матица Македонска“, Господинот Раде Силјан и додаде:„ Сликовницата е интересна и за децата што учат македонски, но и за оние што учат англиски јазик. Таа содржи традиционални и модерни компоненти во себе, кои дури и во светот се иновација за овој тип на книги. Сликовницата „Патувањето на Дедо Мраз“ е уникатно литературно дело за деца од најраната возраст. Покрај интересниот текст, сликовницата изобилува со оригинални илустрации од доајенот на македонското илустрирање, Господинот Миле Топуз“.
На промоцијата во Сиднеј присуствуваше и Дедо Мраз, кој ги одушеви најмладите читатели и се разбира им подели подароци.
Авторот , Жаклина Михајлова – Учителката, подвлече: „Ова е пилот книга , која им претходи на низа други оригинални сликовници. Јас повеќе од триесет години работам како учителка по македонски јазик во Македонија и во Австралија и целото мое искуство во наставата е преточено во книгата. Во сликовницата се кријат интересни тајни за Дедо Мраз, за неговото волшебно патување низ светот секоја година, како и за неговата специјална врска со Македонија. Откријте ги тајните во оваа сликовница.
И не заборавете доаѓа Нова Година , а за Нова Година доаѓа и Дедо Мраз. Време е за подароци. Оваа година подарете знаење и радост! Подарете сликовница!
