Минатиот вторник, 21 јули, во клубот на пратениците во Скопје, претседателот на Република Македонија, д-р Ѓорѓе Иванов, свечено додели Повелба на Република Македонија на организации од дијаспората. Пет организации ја добија повелбата, вклучувајќи ги и Социјалното друштво „Св Наум Охридски“ од Мелбурн и Австралиско македонскиот театар од Сиднеј. Од името на Австралиско македонскиот театар Повелбата ја подигна Васко Србиновски, познат глумец и режисер кој работи во овој театар повеќе години.
Пред доделувањето на Повелбите претседателот Иванов им се обрати на присутните и меѓу другото рече: „Сите вие сте живата врска на Македонија со светот. Вие сте наши амбасадори на полето на културата, уметноста, образованието, добротворството и спортот. Секој ваш успех е и успех за Македонија. Колку поуспешни поединци, толку поуспешна Македонија. Затоа како претседател на Република Македонија во името на македонските граѓани, но и во мое, лично, име сакам да ви се заблагодарам за се што правите за Македонија. А Македонија памети, препознава и вреднува. Затоа, со Повелбата на Република Македонија ви се заблагодаруваме и, воедно, ве покануваме и вас и целата дијаспора да соработуваме и да се сплотуваме. Да бидеме пример за оваа и за идните генерации“. Претседателот Иванов исто така порача: „Не смее да се заборави дека Република Македонија не е само држава на македонските граѓани што живеат во неа, туку и татковина на нејзината дијаспора што живее надвор од неа“.
Повелбата е највисоко признание што претседателот го доделува на организации од дијаспората, а секако Македонскиот театар го заслужува ова признание. Истиот за последните седум години преку своите театарски продукции на достоен начин ја презентираше македонската култура во Австралија и забележа видни резултати во театарската уметност.
Исто така Васко Србиновски на 23 јули поднесе реферат за работата на театарот на Иселеничката културна средба што се одржа во Министерството за надворешни работи, а во организација на Агенцијата за иселеништво.
Честитки до македонските асоцијации кои ја добија повелбата, посебно честитки до членовите на македонскиот Театар кои вложија огромен труд во промовирање на македонската култура во Австралија.
Душан Ристевски
