Потпишувањето на Преспанскиот договор го уништува македонскиот идентитет, а власта можеше тоа да го спречи – треба посилно и похрабро да ги браниме националните интереси – активистите од дијаспората согласни дека македонските власти можеа да најдат поинаков начин да се реши долгогодишниот спор, без да се даде толкава жртва.
Македонскиот активист во Германија Александар Бузлески вели дека неуспешниот Референдум и го покажа патот на власта дека не треба да го потпише Договорот од Нивици.
Безпредметно е да разговараме за успешноста на Референдумот, бидејќи е направена вештачки од марионетската власт. Дијаспората го изрази незадоволството и на улица и на социјалните мрежи. И во Германија беа организирани протести. Јасно е што мисли дијаспората во однос на тоа прашање. Дали Власта можеше да го избегне Договорот? Требаше. Требаше да се искористи пресудата од Хаг, со 14 спрема 1, требаше да се зголеми дипломатската активност на меѓународно ниво. Можеше да се искористи дијаспората и нејзиниот непроценлив потенцијал. Со добра умешност и добра дипломатија можеше да се избегне Преспанскиот договор – вели македонскиот активист во Германија, Александар Бузлески.
„Дијаспората е дел од државата, ние придонесуваме за Македонија и уверени сме дека имаме право да учествуваме во одлуките кои се од национално значење“, вели Ана Дукоска активист во САД, која многу пати организираше протести и повикуваше на обединетост пред да се потпише Договорот.
Години уназад, имаше преговори за промена на името и тие преговори не вродија со плод, како што тоа го направи оваа нелегитимна влада Преспанскиот договор. Сите кои живеат надвор од Македонија, има и можност и решение како и за Преспанскиот договор така и Договорот со Бугарија кој се спрема сега. Не треба да правиме отстапки и треба посилно и похрабро да ги браниме нашите национални интереси – вели активистката во САД, Ана Дукоска.
Протести се одржуваа и во Австралија, каде присуствуваа илјадници Македонци и јасно беа против потпишување на таков Договор. Активистот од Македонската заедница во Австралија смета дека Преспа 2018 го уништи македонскиот идентитет.
Имавме протести на кои присустуваа над 60 000 Македонци, дека не смее да се промени името. И во Собранието и со Референдумот кој не беше успешен, но да кажам за Македонците во Австраија, и за сите Македонци во други места, имавме пуштено писма до Владата, се боревме да го зачуваме нашиот идентитет. Овде сите не нарекуваат северномакедонци, дека нашата држава е Северна Македонија. Не доведоа до една ваква состојба каде се наоѓааме посрамотени, деградирани, понижени, немаме достоинство бидејќи сите ни велат „Па вие доброволно го дадовте името“. Што е единствен случај во светот – вели активистот во Македонската заедница во Австралија Ицо Најдовски.
Гласни против Преспанскиот договор воп дијаспората не беа само македонците кои се иселиле од сегашна Македонија, туку и десетици илјади кои потекнуваат од Егејскиот дел од кои Македонија со потписот на Договорот од Преспа се откажа.
Адријана Алексиеска
