Д-р Емилија Котеска Аврамчева, успешен лекар, претприемач и голем поддржувач на македонската заедница во Полска, им подлегна на повредите здобиени во тешка сообраќајна несреќа кај Варшава.
Како ќерка на бегалец од Егејска Македонија, таа активно учествуваше во бројни активности поврзани со Македонија и секогаш беше подготвена да помогне во проекти од хуманитарен, културен и национален карактер.
Само пред десетина дена донираше средства за поставување спомен-обележје во градот Полице, место кое во 1949 година било собирен центар за децата бегалци од Егејска Македонија.
Според полските медиуми, трагедијата се случила кога Котеска Аврамчева го запрела своето возило на лентата за итни случаи на експресниот пат С8 на делницата Варшава–Прушков, кај крстосницата Опач-Колонија. По излегувањето од автомобилот, била удрена од автобус.
Заминувањето на д-р Емилија Котеска Аврамчева претставува голема загуба не само за нејзиното семејство и пријатели, туку и за македонската заедница во Полска, која во неа гледаше искрен пријател, поддржувач и човек што несебично придонесуваше за зачувување на македонскиот идентитет и за јакнење на врските со татковината.
Нека ѝ е вечна слава и благодарност за сè што направи за Македонија.
