Осум млади Македонци од дијаспората пристигнаа во Македонија за тринеделна програма што ги поврзува со нивните корени преку професионална пракса, културно наследство и нови пријателства.
Со свечен настан во Охрид официјално започна јубилејното, десетто издание на програмата Birthright Macedonia, која и оваа година обедини млади Македонци од дијаспората со нивната татковина.
Изминатиот викенд, осум учесници од Соединетите Американски Држави, Канада, Австралија и Германија пристигнаа во Македонија, каде што ја започнаа својата тринеделна програма за повторно поврзување со своите корени. Програмата опфаќа професионална пракса во македонски компании и организации, запознавање со македонската култура и традиција, како и создавање трајни пријателства и професионални контакти.
Свеченото отворање се одржа во Куќата на Робевци во Охрид, во присуство на овогодинешните ментори, партнери, алумни и бројни гости. Настанот беше посветен не само на почетокот на новото издание на програмата, туку и на одбележувањето на десетгодишниот јубилеј на Birthright Macedonia.
Во рамките на Викендот посветен на македонското културно наследство, учесниците имаа можност да го запознаат Охрид – град под заштита на УНЕСКО. Тие ги посетија Античкиот театар, Плаошник и препознатливата црква „Св. Јован Канео“, а потоа уживаа и во пловидба по Охридското Езеро.
Програмата продолжи со посета на Заливот на Коските и манастирот „Св. Наум“, а викендот беше заокружен со заеднички ручек покрај езерото во Трпејца.
Во текот на оваа недела учесниците ја започнуваат својата професионална пракса во Охрид и околината, каде што ќе стекнат драгоцено работно искуство, додека паралелно ќе продолжат да ја откриваат историјата, културата и традициите на земјата на своите предци.
Од Обединетата Македонска Дијаспора најавуваат дека и во наредните денови ќе споделуваат нови приказни, фотографии и впечатоци од јубилејното, десетто издание на програмата Birthright Macedonia, која веќе една деценија успешно ги поврзува младите Македонци од целиот свет со нивната татковина.
