Од денеска, при излез од Македонија преку граничниот премин Табановце, се постапува и со возачите на возила со странски регистарски таблички за кои системот претходно регистрирал сообраќаен прекршок на територијата на државата.
На возачите им се соопштува дека е евидентиран прекршок, по што им се издава записник за сторен сообраќаен прекршок и прекршочен платен налог. Казната можат да ја подмират во согласност со законската постапка.
Од Министерството за внатрешни работи информираат дека се преземаат активности за непречено спроведување на постапката, како и за намалување на задржувањето на патниците на граничниот премин.
Според МВР, со воведувањето на овој механизам се обезбедува еднаков и неселективен пристап во санкционирањето на сообраќајните прекршоци, без оглед на тоа дали станува збор за возила со домашни или со странски регистарски таблички.
Примената на системот „Безбеден град“ за возилата со странски таблички постепено треба да биде проширена и на другите гранични премини во Македонија.
