Апелациониот суд Скопје ја потврди ослободителната пресуда за поранешниот премиер Никола Груевски во предметот „Талир 2“, кој се однесува на изградбата на седиштето на ВМРО-ДПМНЕ.
Апелациониот суд ја одби како неоснована жалбата на Основното јавно обвинителство Скопје и ја потврди ослободителната пресуда на Основниот кривичен суд Скопје.
Одлуката е донесена на нејавна седница одржана на 26 август 2026 година, по разгледувањето на списите од кривичниот предмет и предлогот на Вишото јавно обвинителство Скопје.
Според соопштението на Судот, дејствијата на поранешниот премиер Никола Груевски, во својство на одговорно лице, биле во рамките на неговите овластувања. Обвинителството не приложило докази дека тој постапувал спротивно на Законот за финансирање на политичките партии.
Во образложението се наведува дека овластениот тужител не докажал, надвор од разумно сомневање, дека градежната компанија „Бетон“ во моментот на склучувањето на договорите со политичката партија вршела јавни услуги во смисла на законот. Поради тоа, Судот оценил дека не постоела забрана за донирање средства, ниту обврска тие да бидат вратени.
Ослободителната пресуда во повтореното судење ја донесе судијката Даниела Алексовска-Стојановска на 14 јули, непосредно пред застарувањето на предметот на крајот од август.
Претходно, на 31 март, пред изнесувањето на завршните зборови, предметот за изградбата на партиското седиште, познато како „Белата палата“, ѝ беше одземен на обвинителката Ленче Ристоска и му беше доделен на друг обвинител. Ристоска потоа поднесе оставка од јавнообвинителската функција, која Советот на јавните обвинители ја потврди на 8 април.
Во првичната судска постапка, во 2022 година, Груевски беше осуден на шест години затвор, додека поранешниот генерален секретар на Владата, Кирил Божиновски, доби условна казна. Со пресудата беше определена и конфискација на партискиот имот, но Апелациониот суд ја укина одлуката и го врати предметот на повторно судење.
Со обвинението за „Талир 2“, Груевски и Божиновски беа товарени за злоупотреба на службената положба и овластувањата. Според обвинителството, тие ѝ овозможиле на компанијата „Бетон“ Скопје да го изгради седиштето на ВМРО-ДПМНЕ во период кога фирмата имала склучено договори за јавни набавки со државни органи, установи и претпријатија.
Со потврдувањето на ослободителната пресуда од страна на Апелациониот суд, жалбата на Обвинителството е одбиена како неоснована.
