На Македонија ѝ е потребен примарен национален дата-центар во кој безбедно ќе се чуваат податоците на државните институции. Проектот е дел од Реформската агенда со Европската Унија, која обезбедува финансиска поддршка за неговата реализација, истакна пратеникот Миле Лефков.
СДС и Венко Филипче секојдневно го критикуваат развојот на индустријата поврзана со дата-центрите. Станува збор за индустрија на иднината, која забрзано се развива во целиот свет, но Филипче, од само нему познати причини, се противи на нејзиниот развој во Македонија.
Во оваа пригода треба да им се објасни и на Филипче и на неговиот другар Зоран Заев, кој очигледно сè уште му дава насоки за работа, што значи изградбата на национален дата-центар.
Македонија веќе има дата-центар во Прилеп, но тој не е примарен, туку секундарен. Тоа значи дека, во случај на евентуален сајбер-напад врз информацискиот систем на одредена институција, резервните податоци се чуваат во секундарниот центар.
Во моментов секоја институција самостојно наоѓа начин за чување и заштита на своите податоци. Токму затоа на Македонија ѝ е потребен основен, примарен национален дата-центар, во кој безбедно ќе се чуваат податоците на сите државни институции.
Изградбата на национален дата-центар е дел од Реформската агенда на Македонија со Европската Унија. За реализација на проектот ЕУ обезбедува финансиска поддршка, додека Македонија има обврска да изгради примарен национален центар за чување и заштита на податоците.
Со неговата изградба ќе се зголеми заштитата на информациските системи на државните институции од евентуални сајбер-напади и ќе се обезбеди поголема сигурност на податоците.
Токму на ваков проект се противи СДС.
Само да потсетиме дека за време на неговото владеење беше извршен сајбер-напад врз системот на Фондот за здравствено осигурување, поради што граѓаните не можеа навремено да ги остваруваат своите права. Беше отежната исплатата на надоместоците за породилно отсуство, како и повратот на средства за лекови и други здравствени услуги.
Оттука, очигледно е дека СДС се противи на развојот на индустрија што ќе овозможи поголема заштита на личните податоци на граѓаните и посигурно чување на податоците на државните институции, истакна Лефков.
