Инфраструктурни вложувања, финансиска поддршка за семејствата и младите, подобри услови во училиштата и развој на туризмот се приоритетите што ги претстави градоначалникот на Општина Маврово и Ростуше, Онер Јакупоски, во отчетот за досегашната работа.
Градоначалникот на Општина Маврово и Ростуше, Онер Јакупоски, на прес-конференција ги презентираше реализираните проекти, активностите што се во тек и плановите за наредниот период. Тој истакна дека работата на локалната самоуправа е насочена кон подобрување на секојдневниот живот во сите населени места.
„Граѓанинот мора да биде на прво место. Општина Маврово и Ростуше им припаѓа на сите, а успехот ќе дојде само ако работиме заедно, со заемна поддршка и доверба“, порача Јакупоски.
Нов резервоар за водоснабдување и подобра патна инфраструктура
Меѓу завршените капитални проекти, Јакупоски ја издвои изградбата на новиот резервоар за водоснабдување во Ростуше, со капацитет од 160 кубни метри, наменет за подобрување на снабдувањето со вода во населеното место.
Во Скудриње е завршена новата улица во месноста Падина, со асфалтирање и поставување улично осветлување. Според градоначалникот, улицата обезбедува пристап до околу 80 куќи. Во Велебрдо е завршено поплочувањето селска улица со павер-елементи.
Реконструкцијата на спортската сала „Македонија“, во близина на Ростуше, е во завршна фаза. Јакупоски посочи дека објектот бил затекнат во руинирана и нефункционална состојба, а по надминувањето на проблемите со проектната документација, се очекува негово пуштање во употреба во октомври.
Во тек е реконструкцијата и асфалтирањето на локалниот пат до Рибница, со очекувано завршување до крајот на ноември. Проектот за патот до Нистрово е во почетна фаза, а предвидениот рок за реализација е декември 2026 година.
Јакупоски ја нагласи поддршката од Владата на Република Македонија и ресорните министерства во реализацијата на инфраструктурните зафати.
Поддршка за новороденчиња, првачиња, ученици и студенти
Во делот на социјалната и демографската политика, општината обезбедува еднократна парична помош од 10.000 денари за првородено, 18.000 денари за второродено и 25.000 денари за третородено дете.
За секое прваче се обезбедуваат 6.000 денари, училишен ранец и комплет училишен прибор. За студентите од општината е предвидена еднократна помош од 12.000 денари, а ист износ добиваат и средношколците што го продолжуваат образованието во СОУ „Маврово и Ростуше“.
Според презентираниот отчет, општината ги покрива трошоците за практична обука за возачка дозвола од Б-категорија за младите до 24 години, како и трошоците за регистрација на фирма за млади претприемачи.
За социјално ранливите граѓани се обезбедува еднократна финансиска помош за потешки оперативни зафати и итни здравствени потреби. Со поддршка од Министерството за социјална политика, демографија и млади се подготвуваат и проекти за активно стареење и за помош и нега во домот на стари и изнемоштени лица.
Вложувања во училиштата и спортските терени
Во завршна фаза е постапката за набавка на нагледни средства, паметни табли и училишни помагала за сите четири основни училишта во општината.
Се изработува и проектна документација за целосна реконструкција на подрачното училиште во Маврово, со која треба да бидат опфатени училишната зграда, дворот и повеќенаменското спортско игралиште.
Паралелно се подготвува документација за реконструкција на спортски игралишта во Требиште, Жировница, Скудриње, Ростуше, Врбен и Јанче.
Почиста животна средина и поквалитетни комунални услуги
Во соработка со Јавното претпријатие за комунални дејности „Маврово“, расчистени се диви депонии во Битуше, Ростуше и Жировница, а активностите треба да продолжат во Велебрдо и Требиште.
Во тек е реорганизација на комуналното претпријатие, со цел подобро собирање на сметот и кабастиот отпад и поредовно одржување на јавната чистота. Извршени се дополнителни контроли на квалитетот на водата за пиење, а уличното осветлување се подобрува со поставување енергетски ефикасни светилки.
Јакупоски најави и изработка на урбанистички планови, најпрво за поголемите, а потоа и за помалите населени места. Се подготвува проектна документација за водоснабдителни системи во Леуново, Врбен, Присојница, Лазарополе и Скудриње, како и за патна инфраструктура во повеќе населени места.
Туризмот како двигател на локалниот развој
Градоначалникот ја истакна поддршката за културните манифестации и спортските настани, посочувајќи го туризмот како еден од главните двигатели на локалниот економски развој.
Како значаен настан го издвои Светското првенство во спортски риболов на крап, одржано на Мавровското Езеро од 2 до 7 септември, на кое, според отчетот, учествувале 33 репрезентации.
Јакупоски порача дека развојот на општината мора да оди заедно со зачувувањето на природното богатство и подобрувањето на условите за локалното население.
„Предизвиците се големи и не можат да се решат преку ноќ. Но тие не се изговор, туку мотивација да работиме повеќе и подобро“, истакна тој, најавувајќи продолжување на проектите во соработка со Советот, општинската администрација, институциите и граѓаните.
