ВМРО-ДПМНЕ: Барбов, Филипче и Заев да одговорат за препораката за лекување на Ива Михаилова во Бугарија
ВМРО-ДПМНЕ во соопштение упатува прашања до доктор Иван Барбов, Венко Филипче и Зоран Заев за постапувањето во случајот со Ива Михаилова и за основата врз која била дадена препораката за нејзино лекување во Бугарија.
Од партијата обвинуваат дека, обидувајќи се да се дистанцираат од случајот, Барбов, Филипче и Заев дополнително се заплеткале во сопствените изјави.
Според ВМРО-ДПМНЕ, објаснувањето на Барбов дека не знаел за каква сообраќајна несреќа станува збор, но знаел дека Михаилова имала бугарско здравствено осигурување, отвора дополнителни прашања за начинот на кој постапувал.
„Како е можно невролог да дава мислење за хируршки интервенции и врз основа на што била дадена конзилијарна препорака, ако пациентката не била упатена на лекарски конзилиум и не поднела барање за конзилијарно мислење?“, прашуваат од ВМРО-ДПМНЕ.
Од партијата бараат одговор и зошто, според нивните наводи, Михаилова по претрпената траума не била упатена на соодветен преглед кај неврохирург или трауматолог.
Во соопштението се поставува и прашањето дали препораката за лекување во Бугарија била поврзана со политички интереси. ВМРО-ДПМНЕ прашува дали Барбов, Филипче и Заев сакале да му направат услуга на Румен Радев преку забрзано упатување на Михаилова на лекување во соседната држава.
Партијата посочува дека билатералната соработка меѓу Македонија и Бугарија во областа на здравственото осигурување не подразбира произволно постапување.
„Постојат јасно пропишани правила за тоа кои пациенти и во кои случаи добиваат лекарска грижа или лекување во други држави“, се наведува во соопштението.
Од ВМРО-ДПМНЕ тврдат дека со постапувањето во овој случај биле пречекорени надлежностите и бараат објаснување за основата и постапката за донесување на препораката.
„Наместо со изјави да се извлекуваат од случајот со Михаилова, Барбов, Филипче и Заев треба да дадат одговори за постапките, улогите и за одлуките што биле донесени“, порачуваат од ВМРО-ДПМНЕ.
