Под мотото „Заедно за иднина – Приклучи се!“, ВМРО-ДПМНЕ од 1 септември започнува голема кампања за ажурирање на постојното членство и прием на нови членови.
Во периодот до 30 ноември, ВМРО-ДПМНЕ ќе спроведе процес со кој ќе направи уште еден значаен чекор во развојот на партијата, со цел изградба на посовремена, поорганизирана и уште посилна политичка организација, подготвена за иднината.
ВМРО-ДПМНЕ има повеќедецениска историја, силна организација и бројно членство. Силата на партијата се луѓето кои со децении се дел од неа, кои верувале и придонесувале и во најтешките периоди, но и новите генерации, кои носат знаење, идеи, енергија и желба активно да придонесат за иднината на Македонија.
Во таа насока, пораката на кампањата е јасна и едноставна:
„Обнови го членството, биди активен и биди дел од иднината.“
Почнувајќи од денес, во период од три месеци, секој постоечки член ќе може да ги потврди или ажурира своите податоци. Истовремено, ВМРО-ДПМНЕ ги отвора вратите за секој граѓанин кој ја прифаќа програмата на партијата и сака да се приклучи.
ВМРО-ДПМНЕ е партија отворена за нови знаења, вештини и енергија. Секој што има идеја, знаење, енергија и желба да придонесе има место во партијата.
Во рамките на процесот, за првпат во Македонија се воведува целосно дигитален начин на зачленување и ажурирање на партиското членство. За таа цел, ИТ-комисијата на партијата изработи веб-апликација, која веќе е ставена во функција во општинските комитети.
Мобилната верзија на апликацијата е доставена до „Гугл“ и „Епл“, а по нејзиното одобрување ќе биде достапна и за мобилните телефони.
Преку дигиталниот процес, пријавувањето, верификацијата, прифаќањето на Статутот и потврдувањето на членството ќе можат да се завршат за само неколку минути, директно преку мобилен телефон.
Ова е уште еден чекор кон модерна, ефикасна и технолошки напредна ВМРО-ДПМНЕ, која се менува во согласност со времето и ги користи современите технологии за да биде поблиску до своите членови, до граѓаните и, пред сè, до новите генерации.
Сепак, во овој процес никој нема да биде оставен настрана. Дигитализацијата е дополнителна можност, а не замена за досегашниот начин на зачленување и ажурирање на членството.
Секој што сака постапката да ја заврши лично ќе може да го направи тоа во општинските комитети. Од 1 септември до 30 ноември, секој ден од 17:00 до 20:00 часот, општинските комитети на ВМРО-ДПМНЕ ќе бидат отворени за членовите и за сите граѓани кои сакаат да се приклучат.
Како и досега, личните податоци ќе се обработуваат во согласност со важечките законски прописи за заштита на личните податоци.
ВМРО-ДПМНЕ ги повикува сите свои членови да го обноват и ажурираат членството, а сите граѓани кои досега не биле дел од партијата, но сакаат активно да придонесат за посилна и поуспешна Македонија, да се приклучат.
Со овој процес се поврзуваат искуството и традицијата со новата енергија.
Твоето место е со нас, затоа што заедно сме посилни и заедно одиме напред.
Заедно за иднина – Приклучи се! За ВМРО-ДПМНЕ, за Македонија.
