Во Музејот на град Самобор синоќа беше одбележана 70 годишнината од излегувањето на стихозбирката „Бели Мугри“ од македонскиот поет и револуционер, Кочо Солев Рацин.
По тој повод, како што јави известувачот на МИА, беше промовиран репринтот на изданието на „Бели Мугри“ што го издаде Заедницата на Македонците во Хрватска во соработка со хрватскиот Совет за национални малцинства.
Промоторот на книгата проф. др. Васил Тоциновски збурувајќи за оваа мала по големина, а голема по значење стихозбирка за македонската литература и народ воопшто потсети дека во 1939 година „Бели Мугри“ е издадена во Самобор, Хрватска со помош на хрватските пријатели на Рацин и додаде оти таа ја отвори новата бесмртна хроника на современата македонска литература.
Појавата на „Бели Мугри“ го идентификува и на светот му подари еден голем поет Кочо Солев Рацин. Рацин пеејќи за македонскиот човек, за понижениот всушност пееше за универзалното значење на човекот воопшто.
Велешанецот Рацин освен стихови напиша и раскази, есеи и еден роман „Афион“ со кои покажува дека и до ден денес е актуелен,а неговото име е симбол на Македонија и на Македонците.
Вториот промотор, новинарот и публицист Огнен Бојаџиски, кој живее во Хрватска истакна дека македонската судбина е содржана во тие, според него, апостолски 12 песни на Рацин во „Бели Мугри“.
Свеченоста беше збогатена со читање на песни од Рацин и македонски изворни народни песни со кои настапија членовите од македонската Заедница во Хрватска од повеќе градови во Хрватска.
На свеченоста присуствуваше и македонскиот амбасадор во Хрватска Марковски и градоначалникот на Велес Горан Петров, град збратимен со Самобор.
Одбележувањето на прославата по повод 70 годишнината од Бели Мугри продолжува денеска со свечено откривање на новата биста на Кочо Рацин, дело на македонскиот акедемски скулптор Томе Серафимовски.
Свеченоста ќе биде збогатена со културно уметничка програма и со настап на повеќе културно уметнички друштва на Македонците од цела Хрватска.
Претседателот на Заедницата на Македонците во Хрватска Ангел Митревски, синоќа истакна дека Македонците се едни од најценетите малцински заедници во Република Хрватска.
МИА
