Иван ТРПОСКИ
Во изминатиов едногодишен период на 2012 година, која од Библиотекарската асоцијација на Австралија беше прогласена како Година за читање на книги, убаво е да дадеме и свој прилог посветен на оваа тема.
На прашањето, колкав беше интересот за читање на книги во изминатиов период, и покрај тоа што аналитичарите ја оценуваат посетеноста како задоволителна, реалната оцена би била незадоволителна. Намалената посетеност на читателите во библиотеките најмногу се должи на творечката распосланост на страниците во електронска форма. Но, да бидеме искрени, книга в раце е едно, а книга во комјутер е друго. Мирисот на книгата читателот го чувствува еднакво како и мислата на авторот пренесена на книжните страници.
За македонските читатели кои повремено ја посетуваат Македонската библиотека, сопственост на Литературното друштво „Григор Прличев“ во Сиднеј, можам слободно да го изнесам следниот податок. Посетеноста, не само во оваа година, туку и во годнините пред неа, е значително намалена. Секако, ова најпрво се должи на комјутеризираната технологија, а уште повеќе на дневно-политичките и верски настани кои ја парализираа не само читачката публика во Република Македонија, туку и македонските заедници ширум светот. Почести посетители моментално се повозрасните луѓе и учениците од локалните училишта, каде се изучува македонскиот литературен јазик. Повозрасните читатели ги позајмуваат книгите со историско-научна тематика, додека учениците ги позајмуваат лектирските книги. Од поредовните посетители во изминатава година ќе ги спомнеме следниве лица: Душан Ристевски, Перо Дамчевски – Коцин, Ирена и Сашко Велјанови, Жаклина Михајлова, Ванчо Салиоски, Борислав Мусовски, Борче Миновски, Лилјана Тошеска, Спасија Огненовска, Кире Трајковски, Благоја Поповски, Илија Велјаноски, Бранко Наумовски, Никола Матоски, Орце Марковски и други. А од учениците поредовни позајмувачи на книги беа: Јованче (13 години) и Филип (9 години) Апостоловски, ученици во Народното училиште во Темпи, Шантел Камнароска (10 години), ученичка во Народното училиште во Рогдаел и Игор Марковски (9 години), ученик во Народното училиште во Калтон.
На последниот собир во библиотеката, покрај честите позајмувачи на книги, присутна беше и г-ѓа Блага Тутеска, пензионирана наставничка по македонски јазик и директорка во Основнтото училиште „Рамко Левката“ во Прилеп, каде ги одработила последните 39 години од својот наставнички живот. Таа апелираше до родителите, што помасовно да ги запишуваат своите деца во етничките училишта, каде се изучува нивниот мајчин јазик и да ги читаат делата од македонските автори. Во нејзина придружба беше и уредникот на веб страницата „Шило весник“ г-дин Оливер Димоски.
Од име на Одборот на Македонското литературно друштво „Григор Прличев“ од Сиднеј, убаво е да им се заблагодариме на нашите членови, на позајмувачите на книги, на донаторите, на соработниците, на целата македонска заедница во Австралија, како и на сите Македонци во целиот свет со честитки за добро здравје и просперитет во животот, како и убав помин за време на Божиќните и Новогодишни празници. Библиотеката со работа ќе почне на 1-ви февруари 2013 година, кога ќе се одржи и првиот состанок.
