Минатиот петок, 11 декември, во просториите на Центарот за емигранти во Рогдал, во присуство на повеќе посетители љубители на поетскиот збор, во организација на Литературното друштво „Григор Прличев“ се промовира книгата поезија „Спомени од Македонија“ на поетот Ристо Сотир Галевски. Промоцијата ја направи професор м-р Славица Ристеска.
Професор Славица Ристеска направи детална анализа на поезијата на Галевски и ги запозна присутните со искрениот и длабоко лиричен поетски дух на поетот кој на лесен начин ги пренесува неговите сеќавања за родното Оризари и македонското поднебје како и историско политичките состојби на Македонија поради кои се исели од родното огниште да формира дом во Сиднеј за своето семејство.
Покрај песни на Галевски во книгата се застапени песни на англиски јазик од неговите внуки Стефани и Натали Секуловски со што се покажува традицијата што ја започна нивниот дедо Ристо за тие да ја продолжуваат со нови теми и форми на искажување.
Со поезија на Галевски настапи артистката Валентина Апостоловска како и неговите внуки Стефани и Натали. Авторот, покрај тоа што прочита песна, тој искрено им се заблагодари на сите они кои помогнаа да се издаде неговата дебитанска книга, спомнувајќи ги: Иван Трпоски за рецензијата и координирање во издавањето на книгата; на Душан Ристевски за финализирање на издавањето; на Мена Ристевска за застапените фотографии кои ја разубавија книгата; на Сашко Вељанов за фотографии и техничката обработка на книгата како и на неговото семејство, сопругата Катерина, ќерката Верка, зетот Ник и внуките Натали и Стефани кои го финансираа издавањето на книгата, а и го мотивираа авторот да твори и го исполни неговиот сон да издаде книга која ќе се чита и остане во аманет на следните генерации да се негува македонскиот јазик и да се почитува македонската нација.
После промоцијата следеше богата македонска закуска припремена од семејството Галевски и Секуловски како и дружење со поетот и присетување на убавата во песна опеана Македонија.
Душан Ристевски
ГОРНО ОРИЗАРИ
Горно Оризари, мое село родно
Со твоето рамно поле плодно
Ти за живот си убаво и згодно.
На северно-источната страна од Битола
Населено долго време си било
И тука гнездо за секогаш си свило.
Од југо-западната страна
Високите планини Пелистер и Баба
Здрава вода и воздух ни дава.
Од источната страна до недоглед
Како тепсија равна
Таму е наша Пелагонија славна.
Горно Оризари, мое село родно
Со твоето рамно поле плодно
Ти за живот си убаво и згодно.
СЕЛСКА МАКА
Дојде лето сонце свети, пече,
Ладовина езерска народот го влече,
На песокот богатите грбови се печат
И душите свои милно си ги лечат.
Земјоделец брада трие
Нема време да се мие
Ниту време за да спие
Амбар спрема, кола спрега
Во полето брза, бега
Жетварите зрело жито жнеат
А пот жешка по лица им леат.
Селанецот на време се брине
Секој клас како да го скине
Мустаќ сучи, слама гмечи
Тешки снопје крева, влечи.
Над планина горе темен облак вие
Силен грмеж од небото бие.
Голема штета дождот направи
Цело поле тој го поплави.
Снежна зима, празни мемови
Гладни деца, вистински гревови.
Власта пари бара од гладни души
А сиромавиот скуби коса, тегне уши.
