ОД ПАТУВАЊАТА ПО СВЕТОТ – БРАЗИЛ (1)
Интересен е податокот дека денешната територија на Бразил била населена уште пред 6.000 години. Повеќето домородни народи кои живееле и живеат на територијата на Бразил се верува дека се потомци од првиот бран емигранти кои пристигнале овде од Северна Азија, поточно од Сибир. Во 1500 година од нашата ера територијата на модерен Бразил броела население од околу 3 милиони жители, разделено во повеќе од 2000 нации и племиња. Во текот на наредните три века, Бразил бил постојано колонизиран од Португалци. Лингвистиката, пак, открила дека во Бразил има над 188 живи домородни јазици со над 150.000 говорници и дека 67 домородни племиња кои сè уште живеат без допир со конвенционалната цивилизација.
Според податоците што ги прочитавме, Бразил е најголема држава во Јужна Америка. Површината и е речиси повеќе од половина на целиот континент, со главен град Бразилија. Бразил на исток е заграден од Атлантскиот Океан со долга брегова линија од околу 7.500 километри. На север се граничи со Венецуела, Суринам, Гвајана и со прекуморскиот оддел на Француска Гвајана. На северозапад се граничи со Колумбија, на запад со Боливија и Перу, на југозапад со Аргентина и Парагвај и на југ со Уругвај. Бројни архипелази припаѓаат на Бразил, како Фернандо де Нороња, Атолските Карпи, Свети Петар и Павлевите Карпи и Тринидад и Мартин Ваз.
Главниот град Бразилија
Оваа огромна јужноамериканска држава е десетта светска економија. Бразил е член и основач на Обединетите нации и Унијата на јужноамерикански нации. Во Бразил е доминантна римокатоличката религија, а државен јазик е португалскиот. Доста различни елементи го сочинуваат бразилското општество со својата мултиетничка комплексност. Бразилската култура, главно, била под влијание на европската, африканската, и домородните култури и традиции. Најголемо влијание има, секако од португалската култура, поради силните колонијални врски на Португалската Империја. Бразил има доста наследено од Португалците,меѓу другото наследен е јазикот, католичката религија и колонијалните архитектонски стилови. Исто така, бразилската култура има влијание од италијанската, германската и од други европски доселеници чие влијание може да се забележи на југ и на југоисток во Бразил.
Домородните народи влијаеле на кујната и јазикот, додека Африканците, донесени во Бразил како робови, влијаеле на јазикот, кујната, музиката, игрите и религијата. Кујната, пак, многу варира од регион до регион. Ова ја рефлектира измешаноста на домородците и емигрантите. Така е создадена национална кујна обележана со зачувување на регионалните карактеристики.
Карневалот со спектакуларни улични паради и музика, е една од посилните слики на Бразил. Тој се одржува секоја година на пред Велигден кога се означува почетокот на великите пости. Карневалот се слави во цел Бразил, секаде е обележан со своите регионални карактеристики, но најспектакуларните славења надвор од Рио де Жанеиро се одржуваат во Салвадор, Ресифе, и други.
Викинзи во Бразил
Религијата е многу разнолика во Бразил, уставот дава слобода на вероисповед, и владата генерално го почитува тоа право во практика. Во Бразил преовладува Римокатоличката црква, правејќи го Бразил најголема като- личка нација во светот. Формалната врска меѓу државата и римокатолицизмот ослабнала кон крајот на XIX век, сепак, до определен степен црквата го задржала големото влијание. Споменикот на Исус Христос над Рио е едно од новите седум светски чуда и симбол на религиозноста на Бразил. Тој е едно од најпосетените и најинтересните места во Рио.
При нашата посета на Рио (авторот на овој текст како учесник на меѓународен симпозиум за религијата, заедно со сопругата) се уверивме дека бројот на протестантите расте. До 1970 година, мнозинството бразилски протестанти биле следбеници на „радиционалните цркви“, повеќето лутеранци, презвитеранци и баптисти. Од тогаш па наваму, бројот на пентокостните и неопентокостните следбеници значајно нараснал. Традиционалните африкански верувања од донесените робови се имаат измешано со католицизмот, и така се создале афробразилските религии макумба, кандомбле и умбанда. Домородните религии варираат од група до група во градовите Рио де Жанеиро, Сао Паоло, Порто Алегро, Флорианополис, Салвадор и други.
Рио де Жанеиро лежи на бразилскиот брег на Атлантскиот Океан, близу до јужниот напоредник, чие што крајбрежје е ориентирано од исток кон запад. Овој град е основан на мал залив наречен Гуанабара, чијшто влез е местото наречено Шугер Лоф. Центарот, јадрото на Рио, лежи на рамнините на западниот брег од заливот Гуанабара. Поголемиот дел од градот, најчесто именуван како Север-ната Зона, се протега на северно – западните рамнини составени од морски и континентални седиментни карпи, како и на околните ридови и неколку карпести планини.
Јужната Зона на градот ги опфаќа плажите кои ги допираат краевите на отвореното море, оваа зона е одделена од Центарот и од Северната Зона со помош на крајбрежните планини. Големата Западна Зона, која долго време била отсечена поради непроодните планински терени, станала проодна и се здобила со нови патишта и тунели до крајот на XX век.
Продолжува
Пишува: СЛАВЕ КАТИН
www.slavekatin.com
