Во организација на Редакцијата на Македонскиот телефонски именик, на 31-ви март, во свечената сала “Conca D’Oro”, во Сиднеј, по 24-ти пат се одржа традиционалната вечер на македонските бизнисмени и професионалци, наречена „Македонска трпеза“. Покрај многубројните гости, присутен на вечерата беше и Амбасадорот на Република Македонија во Австралија Господинот Веле Трпевски, како и генералниот конзул на Република Македонија во Канбера, Господинот Драган Богдановски.
Вечерта, Редакцијата на Македонскиот телефонски именик ги додели највисоките признанија “ Македонско сонце“, за најдобри достигнувања во 2016 година.
Од областа на бизнисот наградата “ Македонско сонце “ за 2016 година, за натпросечни деловни резултати ја доби Господинот Џејмс Рошков, сопственк на Адвокатската компанија, “Hencock Alldis & Roskov” од Сиднеј. Покрај нив номинирани за оваа висока награда беа: Гоце и Елизабета Стојановски, сопстевеници на “Kings Court Delicatessen” и Господинот Димитар Тодоровски, сопственик на ” Healthy Stone Treed” од Сиднеј.
“Македонското сонце“ за најдобри достигнувања во општествените дејности, образованието, културата и спортот, во 2016 година, го доби МКУД „ Илинден“, за успешно организираниот педесет годишен јубилеј од постоењето на друштвото, а номинирани за ова признание беа и новинарката и општественик Радица Бојковска Димитровска и Прилепското друштво „Методија Андонов – Ченто“ од Сиднеј.
Наградата за животно дело ја доби Господинот Тоде Кабровски од Сиднеј.
Вечерта беше прочитано Отворено писмо до жителите во Македонија и до македонците во светот со кое се дава потполна подршка за зачувување на интегритетот и унитарноста на Македонија и остро се осудија сите обиди за да се разнебити татковината , народот и македонскиот јазик.
Забавата помина во пријатна и весела македонска атмосвера. Присутните ги забавуваа музичката група “Арија“ и Репрезентативниот Ансамбал на лауреатот- МКУД „Илинден“ од Сиднеј.
Македонскиот телефонски именик е книга за секој дом. Тоа е најиздавана македонска публикација во дијаспората. Македонскиот телефонски именик е гордост на македонската заедница во Австралија. Редакцијата на Македонскиот телефонски именик на сите Македонци им се заблагодарува на довербата со желби за понатамошна успешна соработка.
Соња Лозановска
