Скоро два месеци огнените стихии бесно хараат низ целокупната територија на Австралија, но најмногу штета претрпеа шумските предели на Викторија и Нов Јужен Велс. Ови огнени јазици проголтаа илјадници, илјадници хектари шума, уништија стотици домови, фарми, спортски и старски центри.. покосија дваесетина човечки живот, илјадници животни и милијарди инсекти.
Пожарите кои причинија неколку милијарди долари штета, се препоставува дека се создадени од човечка негрижа кон заштита на природната средина, а многу од нив токмо човекот е намерен создавач на пожарите. Многу луѓе настрадаа во борбата со пеколната огнена стихија, уште повеќе останаа заробени во шумските лавиринти опколени со оган, чад и животинска смрдија. Тежок и мачен период преживуваат и многу граѓани чии градови се под окупација на силни ветрови кои носат смог, дим и пепел. И Сиднеј ова лето Господово, покрај огромните температури, го надлетуваат црни облаци пропратени со смрад на шумско и животинско гноиво. Луѓето се во паника, некои останаа без домови, а други се здобија со разни телесни заболувања. По медиумите секојдневно кружат емотивни видео снимки од овогодинашните огнени настани во Австралија. Помош доаѓа од сите страни на светот, едни помагаат физички, други финансиски, трети со облека, четврти со прехранбени намирници… Македонците и тие масовно се приклучија во прибирање на парични сретства. Советот на Македонската Заедница за Нов Јужен Велс објави јавен повик до сите црковни општини, културни и спортски друштва, пензионерски асоцијации, бизнисмени… кој колку може финансиски да ја помогне оваа огнена катастрофа што и се случува оваа година на нашата втора татковина Австралија, во која живеат околу 300.000 Македонци.
Деновиве пожар го зафати и излетничкото место Талбинго, кое се наоѓа 500 км на запад од Сиднеј. Како што сме информирани во него изгорела и куќата на нашата сонародничка Жаклина Михајлова, која како што изјавува за радиото СБС и РТВ Скопје покрај куќата и изгореле и многу артефакти, како и национални ракотворби, стари по неколку векови. Таа планирала во една блиска иднина да оснива Етно музеј во Сиднеј. Кога сме при пожарот во Талбинго убаво е да спомнам дека во него имаат соградено свои викендици и следниве активисти: Душан Ристевски, Нада Иванова, Васко Димовски, Петар Јошевски и Претседателот на црквата Св. Димитрија Солунски од Волонгонг. Гратчето е сместено на брегот од реката која истекува од браната на хидроцентралата „Талбинго“ и планинскиот гребен кои создаваат прекрасна панорама, погодни за одмор и рекреација. Нашиот престој, со Душан Ристевски, го искористивме за да прочитаме по неколку свои песни пред споменикот на австралиската писателка Мајлс Франклин на 12.1.2017 год.
Иван Трпоски
ТАЛБИНГО
без болен беше долгиот пат до тебе
до тебе и до твоите боженствени убавини
Господе како си го содал гратчево
до езерото и до планинското зеленило
а над ритчето си ја создал и мистериозната жена
која јуначки се бори со палавите ветрови
и со разбуктаните сончеви огнови
не заменлива е оваа волшебна глетка
и низ ноќите кога кротко ми трчкаа погледите
кон месечината и ѕвездите кои пливаа во езерото
во занес падна и мојот поетски испит
сакав да се искачам на планина
макар и по своите воздишки да газам
да стигнам до неа до убавата мистериозна жена
да ја допрам и да и кажам дека сум в љубен во неа
во неа и во гратчето на Милес Франклин
во кое живеат и творат моите драги пријатели
12.1.2017 год.
Иван Трпоски
