Александар Размоски
Дека дигиталната уметност предизвикува голем интерес меѓу младите во Австралија потврдуваат информациите добиени од Австралискиот национален Музеј во Канбера. Доволно мотивирани и спремни за предизвик, истражуваат во сферата на рударската индустрија. Еден од нив е и 20 годишниот Александар Размоски. Тој е од македонско потекло и вели дека е прв Македонец запишан на Australian National University, во Камбера. Ова му е веќе втора година како студира Диплома на дигитална уметност на Австралискиот национален Универзитет во Канбера. Негова цел е да создаде високо квалитетен визуелен материјал, кој би можел креативно да се изрази преку анимација, звук и визуелни ефекти.
Користејќи ги големата карпа, лопата и кофа како инспирација, се претстави со свој видео проект во Австралискиот национален Музеј во Канбера. Видео проектот, наречен Под земја го прикажува историскиот развој на рударската индустрија во Aвстралија, пронаоѓањето на јагленот но и опасностите од работа во рудник.Многу впечатиливо е и тоа што како позадина ја користи македонската музика. Во текот на снимката јасно се слуша македонскиот традиционален инструмент – тапанот.
Неуморно работел 5 месеци на овој проект за да докаже дека вложениот труд се исплатува. Посебна чест за него претставува што е прв Македонец избран во Националниот Музеј на Австралија.
Александар има голема мотивација и знаење и неговата цел е во иднина да создава вредни уметнички дела интересни за јавноста но и преку кои би го осетиле неговиот вложен труд и емоции .
“Уметноста е совршен начин да се претставам пред луѓето за тоа кој сум јас како личност. Многу сакам да истражувам и тоа е мој главен интерес во уметноста“
Му посакуваме многу среќа во студирањето и остварување на неговата цел да создава високо квалитетни визуелни материјали. Националниот музеј се здобива со нов кадар а Македонската заедница во Австралија вбројува уште една млада личност која со нескриен ентузијазам ги афирмира и македонските вредности во своите дела.
Инаку Австралискиот национален музеј, Камбера е основан во 1980 година и главно се фокусира на истражување на домородното население, европските доселеници, нивната историја, култура и интеракција со животната средина.
Линк од профилот и видео проектот на Александар Размоски на веб страницата на National museum, Australia.
Гордана Димовска
