Македонска алијанса за европска интеграција
Македонската партија во Албанија – Македонска алијанса за европска интеграција (МАЕИ) – викендов одржа изборна конференција во Поградец, Албанија. Нов претседател на општинскиот комитет на Македонската партија е Петре Тодоровски, кој досега беше вршител на должноста секретар на општинската организација.
За потпреседател на општинскиот комитет беше избран Ставре Спировски, додека за секретар беше избран Сокол Шк’мби.
За членови на извршниот одбор на партијата беа избрани Петре Тодоровски, Ставре Спировски, Сокол Шк’мби, Танас Андон, Пандо Насто, Менка Главче, Мариел Граждани, Елена Тодори и Менка Граждани.
На изборната конференција учествуваше и претседателот на Македонската партија во Албанија, Едмонд Темелко, кој ја изрази својата поддршка кон новото раководство и повика на единство и самодоверба меѓу Македонците кои живеат во Поградец. Едмонд Темелко повика на масовен одзив на Македонците на престојните парламентарни избори и побара да гласаат за кандидатите на Македонска алијанса за европска интеграција.
– Од резултатите на овие избори ќе зависи интеграцијата на Македонците во институциите на системот во Поградец и воопшто во Албанија, – нагласи Темелко.
Петре Тодоровски по изборот изјави дека меѓу другото ќе работи за постигнување на што подобри резултати за претстојните парламентарни избори и дека општинскиот комитет на Поградец ќе се залага за унапредување на правата на Македонците во Поградец.
Престојните парламентарни избори во Албанија ќе се одржат на 23 јуни.
Конгресот на Македонската партија во Албанија треба да се одржи кон крајот на месец април 2013 година.
