Иван Трпоски
Повод на разговорот е најновата драмска продукција на Австралиско-македонскиот театар од Сиднеј „Борење со мечка“ од Душан Ристевски во режија на Стефо Нанцу. Поведовме разговор со Душан за неговото најново дело.
- Секогаш нудите нешто ново за македонската заедница. Сега, која е темата што се обработува во оваа драма со малку чуден наслов?
Треба да се дојде и да се види за да се разбере името на драмата, но воглавно е приказна што една постара жена ја раскажува за храброста и борбеноста на еден човек соочен со непобедлив ѕвер. Ние луѓето често пати се соочуваме со животни предизвици и од нас самите зависи како истите ќе ги решиме или одгатнеме. Големо влијание имаат нашите родители како и средината во која сме пораснале и средината во која живееме. Драмата „Борење со мечка“ обработува тема воглавно за гордоста, а и тврдоглавоста на мажите, за нивната маженственост и скриена слабост, а и страв да се признае дека се’ не се победува со мускулести раце и јаки нозе. Мошне познато е дека мажите на поинаков начин комуницираат од жените. Многу жени ги критикуваат мажите дека истите имаат лоша персоналност или табиет без да влезат подлабоко и да ги разберат „сигналите“ на машката комуникација.
- По твоето кажување ова како да е психолошка драма за да се разобличат машките суети?
Мажите мислат дека се недопирливи, никаква болест не може да ги легни в кревет, не им треба лекар ниту пак медицина. Мислат дека депресивноста е само за жените, превентивните мерки или рутинските прегледи се непотребни и дека се’ се лекува со ракија или пак со тревки и чаеви. Како пример, во Австралија, мажите во просек помалку живеат од жените и мажите повеќе умираат од рак отколку жените. Исто така мажите помалку одат на рутински прегледи и не се сериозни при лекувањето на болестите. Исто така треба да се забележи дека Македонците, во споредба со другите етнички групи, најмалку прават рутински прегледи како превентативна мерка. Секако сето ова зависи од нашата неинформираност, образование и културна позадина дека ако речеме „скраја нека е“ ја спречуваме болеста и дека „од пишаното не се бега“.
- Тогаш зошто се боледува во тајност кога овде имаме добри лекарски служби и третмани?
Поради тврдоглавоста, поради незнаењето како да се комуницира, поради стравот да се покаже слабост и стравот дека тешко човек може да се „бори со мечка“ и дека „ако се умира да се умре машки“. Но, исто така, мажите сакат да си ги заштитат своите семејства до последен момент, не сакаат да ги загрижуваат своите најмили и ја кријат својата болест. Доколку некој треба да страда, чувствуваат дека тие треба да страдаат, а не нивните жени/партнерки или деца.
- Кои се „борачите“ во оваа драма?
Улогите ги толкуваат Васко Србиновски, Ирена Вељанова, Никола Апостоловски, Валентина Апостоловска, Стефани Степановска, Јаворка Котевска, Самоил Митревски, Владо Сазданов и Мена Ристевска.
- Кога е премиерата на „Борење со мечка“?
Премиерата е на 11-ти мај. Претставите се закажани во следниве места:
Рогдаел: Сабота, 11-ти мај и петок, 31-ви мај во Македонскиот културен центар Илинден, 65 Railway Street, Rockdale.
Банкстеон: Петок, 24-ти мај во Bankstown Polish Club, 15 East Terrace, Bankstown.
Квинбијан: Сабота, 25-ти мај во Македонскиот општински центар, 266 Crawford Street Queanbeyan.
Волонгонг: Сабота, 1-ви јуни во Port Kembla RSL, Cnr Allen St. and Military Rd. Port Kembla.
