Охрид започнува активна соработка со Виндзор – Канада
Економската презентација на Македонија во соработка со Стопанската Комора на Западно Онтарио, иницираната соработка со општина Виндзор, Корпорацијата за Економски развој и универзитетите во градот ја ставија Македонија во центарот на медиумското внимание во градот. Градоначалникот на Виндзор, Еди Френсис, му се заблагодари на посетата на македонскиот амбасадор и најави интензивирање на соработката со новиот градоначалник на Охрид, Никола Бакрачески.
„Тоа што Охрид има нов градоначалник, полн со енергија и иницијативи, за нас значи дека оваа соработка има потенцијал и во неа вреди да се инвестира.“ – изјави градоначалникот на Виндзор, Еди Френсис, вчера, 03 јуни, на чинот на возобновување на програмата за побратимување на двата града, која стагнирала во период од триесетина години.
„Македонија и Охрид најдоа добри пријатели тука во Виндзор“-изјави македонскиот амбасадор-„сигурен сум дека многу ќе научиме едни од други, и ќе придонесеме за благосостојбата и просперитетот на нашите граѓани и народи“. Македонската заедница им изрази огромна благодарност на пратениците од Виндзор, кои застанаа во активна поддршка на Македонската група во Канадскиот парламент. Пратеникот на владеачката конзервативна партија Џеф Ватсон и влијателниот опозиционер Брајан Меси, двајцата од Виндзор, се потпретседатели на Македонската група во Канадскиот парламент, а својата поддршка ја изрази и влијателниот Џозеф Комартен, Потпретседател на Канадскиот парламент од овој град.
На презентацијата на можностите за инвестирање во Македонија, во Економската комора на Виндзор и Есекс, присуствуваа повеќе претставници на автомобилската, прехрамбената и сервисната индустрија во градот, а презентации и разговори македонската делегација имаше и во Корпорацијата за Економски развој на Виндзор и Есекс.
Претседателот на Стопанската комора Мет Маршан го изрази своето задоволство од присуството и партнерството со Македонската амбасада, а особен интерес се разви и за презентацијата на реформите и резултатите на македоскиот образовен систем. И Универзитетот на Виндзор и франкофонскиот Колеж Бареал, за технологии и применети уметности изразија интерес за соработка со Македонските високообразовни институции во наредниот период.
Водечкиот медиум Виндзор Стар објави прилог со изјава од македонскиот амбасадор, а за настаните јавија и американско-канадскиот Биз Екс Магазин и регионалните радија.
