Во отава се пречекува со македонско вино
На Свечениот годишен прием организиран во чест на новопристигнатите дипломати во Канада, а под покровителство на Градоначалникот на Отава, се пиеше македонско вино во комбинација со индонезиска храна. Штипскиот Мерлот од Езимит беше здравицата, со која дипломатите од сите континенти, ја започнаа својата кариера во Канада.
Собирот е во организација на Дипломатската Асоцијација во главниот град на Канада, а од годинава е под покровителство на Градоначалникот на Отава, Џим Ватсон.
Во рамките на собирот на сите новопристигнати дипломати им беше поделен Прирачник со корисни информации за животот и работата во оваа метропола. Свое обраќање освен градоначалникот, имаа и членови на Бордот на дипломатската асоцијација, како и истакнати претставници од најголемите канадски компании.
Амбасадорот Ватсон го нагласи значењето кое за Отава го имаат претставниците на дипломатската заедница, како во секојдневниот живот во градот, така и во долгорочните пријателства кои Отава преку овие луѓе ги гради со светот.
Македонскиот амбасадор Тевдовски им порача на новите дипломати дека, како што се пречекани со македонско вино и индонезиска храна, така во својот мандат ќе имаат можност да се запознаат со културата и традициите на народите од сите континенти, зошто Канада нашла место и улога за сите нив во своето општество. „До минатата година ние дипломатите мислевме дека Фестивалот на Лалето е најзначајната холандска традиција во Отава, но по годинешниот настап на Македонските играорци на фестивалот тој станува традиција и за Македонците кои живеат во престолнината на Канада“ –нагласи амбасадорот.
Заблагодарувајќи се на канадскиот бизнисмен од македонско потекло Енди Плуков за донацијата на македонско вино, македонскиот амбасадор нагласи дека дијаспорите на сите народи во Канада претставуваат огромна предност и можност дипломатите од сите земји да имаат добра стартна позиција во развивањето на билатералните односи.
Претставникот на најголемиот канадски производител на авиони, компанија Бомбардие, Пиер Шенпјан, го нагласи задоволството што на вакви манифестации канадските компании можат да се запознаат со културата и традициите на различни земји и народи, што е основа за идната успешна соработка.
MACEDONIAN UNITED PRESS
Оваа е-пошта е заштитена од spambots, треба да вклучите JavaScript за да ја видите
