Димитар Мојановски неодамна беше награден за најголем читател на книги во Библиотеката „Григор Прличев“ при истоименото Литературно друштво во Сиднеј. Поводот на разговорот беше токму неговата долгорочна љубов со шаховската табла која отпочна од своето родно Чаништа да продолжи како војник во ЈНА, потоа гастарбајтер во Австрија и печалбарство во Австралија.
Димитар е роден во Чаништа и уште од своите млади години го напушти селото како и многут други младинци во 60-тите години за да си ја бара среќата во западно-европските држави. Во Австрија работеше на бродовите на Дунав па после преселбата во Австралија во 1971 год. некое време помина во Ливницата на железо во Порт Кембла за потоа да се пресели во Сиднеј и да се вработи во државното водостопанство, а повеќе од 30 години работеше како возач на автобус. Се ожени за Симјанка од Крушејца и е татко на две ќерки и еден син кои се сите родени и живеат со своите семејства во Австралија.
Димитар, со преселувањето во Австралија слободното време, иако не знаеше англиски, го користеше во дружење со познати австралиски шахисти и членување во клубови. Бидејќи беше искрено и неизмерно заљубен во шахот, одеше на шаховски турнири во повеќе градови во Австралија. Мојановски не само што се бореше на шаховската табла тој беше и главниот организатор во организирање на шаховски турнири во првиот македонски шаховски клуб кој прво започна да функционира токму во Литературното друштво за да продолжи во просториите на Црквата Св. Петка во Рогдаел под името „Македонски шаховски клуб Илинден“. На повеќе турнеи самиот клуб и тој лично освојувале прво, второ и трето место, а најповеќе му значеше групното играње со познатиот руски шахиста Карпов кој беше еден од 72-те играчи.
Сега Мојановски своите пензионерски денови ги поминува во читање книги и играње шах на интернет и локалниот шаховски клуб во Сиднеј.
Душан Ристевски
