Милена Георгиевска – главен уредник на списанието „Македонски Глас“ – Хрватска
За идеите се бореле нашите предци, за идеите се гинело и се гине, за нив се застапуваме и ние сега. Ги учиме нашите деца да им се раѓаат идеи. Во основа, секоја идеја има соодветна смисла. Колку е таа оправдана или не, оценуваат другите.
Како најголема морална вредност во идеите се наметнува доброто. Да се биде добар е особина која му одговара на човекот. А човечноста е должност на секој поединец и услов за добар живот. Тоа подразбира соработка со другите, дијалог, љубов и достоинство на личноста. Да му помогнам на некого – добра идеја! Да ни помогнат нас, исто така е добра идеја.
Сократ тврдел дека човекот мора да знае што е добро, за да може така и да постапува. Платон ја гледал добрината како врховна идеја кон која сите тежнееме.
И идејата за формирање на ЕУ, настаната по Втората Светска Војна, имала за цел на Европа да и` донесе мир, стабилност и напредок. Во фундамент како добра идеја. За реализирање на одредена идеја понекогаш е потребен трновит пат, долго време, многу одрекувања. Во таква ситуација се најде Република Македонија која е влезена во лавиринт и никако да го пронајде патот до евроатланските интеграции. Но, не затоа што не може, туку затоа што други не и` дозволуваат.
Е сега, лично и најмоќната жена на светот, германската канцеларка Ангела Меркел ќе ни го крои името за да се најде решение за Република Македонија во спорот со Грција. За да излеземе од лавиринтот. Добра идеја!
Но, овде се наметнува прашањето уште колку ли време само ќе не` тапкаат по рамо? И да се најде вистинско решение кое нема да ни го згазне достоинството. Затоа што Македонци можат да бидат само Македонци и ништо друго.
