Неколку месеци пред избувнувањето на Илинденското востание, американскиот весник The Washington Times објавил опширен извештај од својот дописник во Софија, Х. Р. Чемберлејн, кој известувал за политичката состојба на Балканот, македонското револуционерно движење и односот на Бугарија кон настаните во Македонија.
Написот е објавен на 26 април 1903 година, само нешто повеќе од три месеци пред почетокот на Илинденското востание.
Во делот во кој ја објаснува силната поддршка што македонското движење ја имало во тогашна Бугарија, Чемберлејн ја запишува следната реченица:
„Вистина е дека оваа земја силно сочувствува со Македонското движење. Близу половина од населението се Македонци по род или по потекло.“
Во истиот текст американскиот дописник наведува и дека целта на македонското револуционерно движење е независност, иако, како што пишува, таа честопати се претставува под терминот „автономија“.
Чемберлејн наведува дека пред да го подготви текстот повеќе недели собирал информации од високи државни претставници, дипломати и личности непосредно вклучени во случувањата на Балканот.
Кон крајот на XIX и почетокот на XX век, голем број жители од Македонија се преселиле во Бугарија како бегалци, печалбари или револуционери. Поради тоа, многу современици забележувале значително присуство на население со потекло од Македонија во тогашното Кнежество Бугарија.
Написот на The Washington Times претставува интересен историски извор бидејќи сведочи за тоа како американски новинар ја перципирал политичката и етничката состојба на Балканот непосредно пред Илинденското востание.
