ОБЈАВЕНА ПЕТТАТА ЕПИЗОДА ОД СЕРИЈАТА „АНТИЧКИТЕ МАКЕДОНЦИ НЕ БИЛЕ ГРЦИ“
Александар ДОНСКИ
Деновиве на Youtube е поставена петтата епизода од документарната серија „АНТИЧКИТЕ МАКЕДОНЦИ НЕ БИЛЕ ГРЦИ“ (“THE ANCIENT MACEDONIANS WERE NOT GREEK”), чиј комплетен автор е Александар Донски. Серијата е во продукција на Lloyd Harrison Entertainment Group од Сиднеј, извршен продуцент на серијата е Џим Стефан, ко-продуцент е Горан Котев, а асоцијативен продуцент е Андрија Петревски, сите од Сиднеј. Текстот го читаат Бубе Донска и Стефо Нанцу. Во серијата ќе бидат претставени сведоштва од над педесет антички автори според кои античките Македонци не биле никакви „Грци“ како што тврди денешната грчка пропаганда. Авторот на серијата Александар Донски очекува оваа серија да ги разниша темелите на грчката историографија и пропаганда кога е во прашање античка Македонија.
Петтата епизода е посветена на сведоштвата од атинскиот оратор Есхин и анонимен христијански автор Есхин (Aeschines) се родил во 389, а починал во 314 година пред Христа. Тој бил познат атински говорник и политичар, чија кариера била тесно поврзана со Македонија.
Една од првите мерки што ги превзел Филип Втори (таткото на Александар Велики Македонски) по засилувањето на моќта на Македонија, била да ги избрка грчките колонисти од македонскиот брег. Една од овие колонии бил градот Олинт, кој во 348 година пред Христа, бил завземен од Македонците, а голем дел од грчкото население (заедно со војниците) биле продадени во ропство. По ова Есхин бил испратен од Атина на Пелопонез во мисија да ги бунтува и предупредува тамошните Грци против опасноста од Македонија. Оваа дејност на Есхин продолжила и следната 347 година пред Христа, кога Есхин ги убедувал и Грците од Аркадија да се обединат против опасноста од Македонците. Но, истата година кај Есхин се случил голем пресврт. Тој бил испратен во мировна мисија во Македонија кај Филип Втори и толку останал восхитен од него, што целосно застанал на страна на неговата политика. Оттогаш Есхин сите свои активности ги посветил во убедување на Грците да не им се спротивставуваат на моќните Македонци, туку да го го одржуваат мирот со нив. Меѓутоа мнозинството Грци биле против ваквите идеи затоа што сакале да си ја зачуваат независноста. Најгласни од нив биле Демостен и Тимарх, кои во Атина, но и среде останатите Грци, биле најголемите опоненти на промакедонската политика на Есхин, обвинувајќи го за велепредавство. Есхин пак возвраќал со напади против нив преку своите пишани дела. Едно од ваквите дела е познато под името „Против Тимарх“. Потоа (во 343 година пред Христа) Демостен го нападнал Есхин со говор познат под името „За лажната амбасада“. Есхин одговорил со говор со ист наслов. Во оваа борба помеѓу промакедонски и антимакедонски настроените Грци се вклучил и извесен Ктесифон на страната на Демостен. Тој предложил Демостен да добие златна круна за своите заслуги за татковината (Атина). На ваквиот предлог реагирал Есхин со објавувајќи го својот говор насловен како „Против Ктесифон“. Сепак во Атина надвладеале идеите на Демостен за спротивставување кон Филип и Македонија. Заради тоа Есхин заминал на Родос, а подоцна и на Самос, каде починал на возраст од 75 години.
Иако Есхин бил огнен бранител на промакедонската политика на Грците, сепак тој јасно ги издвојува Македонците како посебен народ во однос на Грците. Во „Говорот против Ктесифон“, Есхин, меѓу другото, пишува: „…Министрите на Филип стигнаа во Атина, а нашите сѐ уште беа во странство, работејќи на тоа да ги бунтуваат Грците против Македонија“. (“The Oration against Aeschines“, Translation, introduction, and notes by Thomas Leland (1722-1785).
Овде практично Есхин ги обвинувал приврзаниците на анти-македонската политика на Атина, кои ги бунтувале Грците од регионот против Македонија, дури и во време кога Македонците испратиле свои мировни претставници во Атина.
Доказ дека Есхин не ги сметал Македонците за Грци има и во неговиот говор „За амбасадата“ (“On the Embassy”). Но, пред да го претставиме треба да дадеме едно дополнително објаснување поврзано со постарата историја на Грците. Се работи за Амфиктионскиот Совет. Овој Совет (некаде опишан како „Лига“), бил создаден кон крајот на VII век пред Христа. За да дадеме објаснување за неговото создавање и намена, ќе пренесеме цитат од светски познатата ЦД енциклопедија „Микрософт Енкарта“ (1998 год. наслов Amphictyonic League), овде читаме:
“Амфиктионскиот Совет бил заедница од античките грчки племиња и бил создаден за да го заштити храмот на Деметар од Антела, во близина на Термопилите. Подоцна оваа заштита била пренесена и на храмот на Аполон во Делфи. На почетокот тоа била религиозна организација, но подоцна станала политички инструмент во интерес на нејзините најмоќни членови. Дванаесетте членови на овој Совет се среќавале еднаш во шест месеци во Делфи или на Термопилите.”
Значи Амфиктионскиот Совет бил сегрчка етно-културна заедница и ова денес е сосема добро познато. Есхин ги набројува племињата кои го сочинувале овој Совет. Тие биле: Тесалијци, Беотијци, Дорци, Јонци, Перабејци, Магнети, Локријанци, Етени, Фтиоти, и Малеанци (Aeshines, “On the Embassy“, 2.116)
Не само што Македонците овде не се спомнати како членови на овој сегрчки Совет, туку таков е случајот и со племињата кои живееле во Епир. Ова е навистина силен аргумент во полза на фактот за не-грчкиот етнички карактер не само на Македонија, туку и на Епир, но и на други области, кои денешната грчка историографија ги претставува како „грчки“ во времето на антиката. Практично ниту Македонците ниту Епирците себеси се сметале за Грци, ниту пак тогашните Грци ги сметале нив за свои “сонародници”.
Значаен е и фактот дека имињата на грчките племиња кои го сочинувале Амфиктионскиот Совет ги дале и други антички автори, независно еден од друг (за кои пишуваме во продолжение). И кај ниту еден од нив Македонците (но и Епирците) не се третирани за Грци.
АНОНИМЕН РАНОХРИСТИЈАНСКИ АВТОР
(ОКОЛУ IV ВЕК)
Овој ранохристијански автор е познат само по кратките воведни коментари за некои од Писмата на Свети Павле од Новиот Завет. Овие воведни коментари се претставени и обработени во книгата „The Gospel History and its transmission“ („Историјата на евангелијата и нивното пренесување“), објавена во 1906 година.
Она што е интересно за темата што ја обработуваме е тоа што овој анонимен автор го третира и етничкото потекло на луѓето на кои свети Павле им ги испраќал своите писма. Така, на пример, под поглавието насловено како „За Галатјаните“, тој пишува: „Галатјаните се Грци“.
Под поглавието насловено како „За Коринтјаните“, тој пишува: „Коринтјаните се од Ахаја“.
Под поглавието насловено како „За Римјаните“, тој пишува: „Римјаните се дел од Италија“.
Под поглавието насловено како „За Колосјаните“, тој пишува: „Колосјаните, исто како и Лаодикијците, се од Азија“.
Меѓутоа, под поглавието насловено како „За Тесалоникијците“, тој пишува: „Тесалоникијците се Македонци, кои го прифатија Словото на вистината и ја зачуваа верата дури и кога беа прогонувани од своите сограѓани “.
Под поглавието насловено како „За Филипјаните“, тој пишува: „Филипјаните се Македонци. Тие го прифатија Словото на вистината, го зачуваа со верба и не примија лажни апостоли.“ (Подетаљно во: “The Gospel History and its transmission” F. C. Burkitt, Gorgias Press, 2006, ISBN: 978-1-59333-529-8).
Значи еве уште еден антички автор кој немал сомнение дека Македонците биле посебен народ во однос на Грците.
Петтата епизода може да се погледне на следниот линк:
https://www.youtube.com/watch?v=bnhneQNzsTo
Документарен филм со дел од активностите на А. Донски може да се види на следниот линк:https://www.youtube.com/watch?v=5S26QOz71gU&feature=share
Авторот и продуцентите упатуваат апел до сите македонски патриоти и пријатели на Македонија да го поддржат снимањето на серијата до крај, за што дополнителни податоци ќе најдат на следниот линк:https://www.gofundme.com/aleksandardonski.
Приклучете се и Вие кон македонските патриоти и пријатели на Македонија кои го помагаат снимањето на серијата која ќе го нанесе досега најголемиот удар против грчката анти-македонска пропаганда!
Воедно се повикуваат сите да ги испраќаат линковите од веќе снимените епизоди од серијата до што е можно поголем број странски субјекти.
Биста со ликот на Есхин
