Почитувани пријатели, поддржувачи и сите хумани луѓе од Македонија и дијаспората,
Петро Алексовски, автор на документарниот филм „Македонец“ и изложбата „Драга мајко“, започна значаен проект за изградба на мал споменик во градот Полице, Полска – во чест на македонските деца-бегалци кои по Граѓанската војна во Грција биле згрижени таму.
Во прилог е прелиминарниот дизајн (концепт) за спомен-плочата што е планирано да биде поставена на камен од прилепски мермер.
Во Полице некогаш престојувале околу 1.750 македонски деца-бегалци. Денес, локалните власти активно ја поддржуваат иницијативата со желба историјата и судбината на Македонците во нивниот град трајно да останат запаметени. Во рамки на проектот веќе беа организирани проекции на филмот и изложба посветена на оваа тема.
Филмот „Македонец“ е документарно сведоштво за раселувањето на македонските деца од Егејска Македонија за време на Граѓанската војна во Грција, на кои подоцна им било одземено правото да се вратат во своите родни домови.
Главен лик во филмот е Мито Алексовски, кој како деветгодишно дете бил принуден да го напушти својот дом и своите родители. Неговиот син Петро Алексовски, режисер на филмот, патува во Грција во потрага по корените, спомените и трагите од семејниот дом.
Филмот беше прикажан во Европскиот парламент, во повеќе земји низ светот, како и во Грција, а неколкупати беше емитуван и на полската телевизија.
Изложбата „Драга мајко“ претставува продолжение на филмот и сведоштво за судбините на македонските деца-бегалци депортирани од Грција во 1948–1949 година, како и за полските семејства кои им помогнале. Таа содржи 17 панели со фотографии и архивски материјали собирани со години од авторот Петро Алексовски и претставува искрен израз на благодарност кон Полска за спасувањето на македонските деца.
Покрај изложбата и филмот, годинава започна и проектот за изградба на споменикот во Полице. Планирано е спомен-плочата да биде поставена на камен од прилепски мермер, како симболична врска со Македонија и траен спомен на македонските деца-бегалци.
За реализација на проектот потребна е поддршка за набавка и транспорт на мермерот од Прилеп до Полска. Според проценките, трошокот изнесува околу 2.000 евра.
Ги повикуваме сите луѓе со добра волја, компании, иселеници и поддржувачи на македонската историја да се вклучат како спонзори и помагачи во ова значајно историско сведоштво.
Секоја помош е добредојдена и ќе претставува траен белег во чест на македонските деца-бегалци.
Заинтересираните за поддршка и повеќе информации можат да стапат во контакт со Петро Алексовски, кој живее во Полска.
Petro Aleksowski
tel: +48 603 656 454
