Луксузното службено возило, кое пред седум години беше набавено за околу 67.000 евра, е продадено на јавна аукција, а средствата ќе бидат искористени за намалување на долговите на Општина Струга.
Службеното возило „Ауди А6“, кое со години го користеше поранешниот градоначалник на Струга, Рамиз Мерко, е продадено на јавна електронска аукција за 1.350.000 денари, односно околу 22.000 евра. Нов сопственик на автомобилот е компанија од битолскиот регион.
Автомобилот беше набавен пред седум години за околу 67.000 евра, во период кога Општина Струга се соочуваше со сериозни финансиски проблеми. Неговата набавка тогаш предизвика силни реакции во јавноста и беше предмет на судска постапка против тогашниот градоначалник Рамиз Мерко.
Продажбата е реализирана по јавно наддавање, а според информациите од Општина Струга, средствата ќе бидат насочени кон намалување на општинските долгови, како дел од мерките за финансиска консолидација.
Автомобилот со години беше симбол на јавните полемики околу трошењето на општинските средства, особено поради тоа што беше купен во време кога сметката на општината беше блокирана.
Иако против Мерко беше поведена судска постапка за набавката на возилото, Основниот суд во Струга донесе ослободителна пресуда.
Со продажбата на ова возило Општина Струга обезбеди дополнителни средства што ќе бидат искористени за намалување на општинските долгови.
