Осум млади Македонци од дијаспората преку пракса, културни посети и средби со институции и личности од јавниот живот ги зацврстија врските со својата татковина
Со свеченост во хотелот „Инекс Олгица“ во Охрид беше затворено јубилејното десетто издание на програмата Birthright Macedonia 2026, во организација на Обединетата македонска дијаспора (United Macedonian Diaspora – UMD).
Осум млади Македонци од дијаспората успешно ја завршија тринеделната програма, чија цел е да им овозможи на младите со македонско потекло подобро да ја запознаат Македонија преку професионална пракса, културни искуства и средби со институции и претставници на јавниот живот.
На завршната свеченост беа одбележани достигнувањата на учесниците, но и пријателствата што ги создадоа и врската што ја изградија со својата прадедовска земја.
На настанот присуствуваа ментори и претставници на компаниите и институциите кои беа домаќини на практикантите, меѓу кои Костал Македонија, АД Охрид, Охридскиот завод и музеј, Kasarna Hub и Младинскиот центар Охрид, како и поранешни учесници во програмата, претставници на локалната заедница, поддржувачи и членови на македонската дијаспора.
Годинава, за првпат, програмата беше базирана во Охрид, што им овозможи на учесниците одблиску да го запознаат едно од најзначајните културно-историски подрачја во Македонија. Тие ги посетија знаменитостите под заштита на УНЕСКО, меѓу кои Самоиловата тврдина, Плаошник, Античкиот театар и црквата „Св. Јован Канео“, како и Заливот на Коските, манастирот „Св. Наум“ и Трпејца.
Во рамките на програмата беа организирани и патувања во Скопје и Битола. Учесниците ги посетија Кањонот Матка, Водно, Скопското Кале, Старата скопска чаршија и плоштадот „Македонија“, а во Битола ги разгледаа црквата „Св. Димитрија“, Саат-кулата, Музејот на Битола и Широк Сокак.
Нивното културно патување заврши со присуство на традиционалната Галичка свадба, каде што имаа можност да ги доживеат вековните македонски обичаи, народната музика, ората и прочуеното „Тешкото“ во неговата автентична средина.
Покрај професионалната пракса, секоја среда беше посветена на образовни и културни активности преку иницијативата „Outside the Office Wednesday“. Во тој дел од програмата младите се сретнаа со претседателката Гордана Сиљановска-Давкова, ја посетија Општина Охрид и разговараа со претседателот на Советот на Општина Охрид, Кирчо Божиноски, за унапредување на врските меѓу Македонија и дијаспората. Тие се сретнаа и со митрополитот дебарско-кичевски Георгиј, а ги посетија и Музејот на македонската борба за самостојност, Меморијалниот центар на холокаустот на Евреите од Македонија, Археолошкиот музеј и гробот на Гоце Делчев.
Со годинашното издание, Birthright Macedonia одбележува десет години континуирано постоење. Од почетокот на програмата досега учествувале повеќе од 70 млади Македонци од Соединетите Американски Држави, Канада, Австралија, Обединетото Кралство, Швајцарија, Босна и Херцеговина, Нов Зеланд, Германија, Унгарија и други земји.
Преку долгогодишната соработка меѓу Обединетата македонска дијаспора (UMD) и Македонскиот центар за меѓународна соработка (МЦМС), програмата продолжува да им овозможува на Македонци од втората, третата и четвртата генерација во иселеништвото да ја посетат својата татковина, честопати за првпат, и да ја запознаат нејзината историја, култура и традиции.
По завршувањето на програмата, учесниците се враќаат во САД, Канада, Австралија, Унгарија и Германија, носејќи со себе не само професионално искуство, туку и нови пријателства, незаборавни спомени и уште посилна поврзаност со Македонија.
