Членот на Извршниот комитет на ВМРО-ДПМНЕ и министер за финансии, Гордана Димитриеска Кочоска, на одбележувањето на 36-годишнината од основањето на ВМРО-ДПМНЕ во Струмица упати честитки до членството, симпатизерите и поддржувачите на партијата, истакнувајќи дека ветераните се меѓу најзаслужните за создавањето и опстојувањето на партијата низ годините.
Во изјава за Телма телевизија, таа упати посебна благодарност до генерацијата која во најтешките времиња ја постави основата на ВМРО-ДПМНЕ.
„Сакам да им честитам на сите симпатизери и поддржувачи на ВМРО-ДПМНЕ и да ја искористам приликата на ветераните посебна честитка да упатам, бидејќи тие се најзаслужни за основањето на партијата, особено во еден тежок период“, истакна Димитриеска Кочоска.
Таа потсети дека кога ВМРО-ДПМНЕ ја презеде одговорноста за водење на државата, состојбата во јавните финансии била исклучително тешка, со сериозни проблеми во буџетот, ниско ниво на средства на државните сметки и бројни неисплатени обврски кон граѓаните.
Според неа, денес разликата е видлива преку засилен инвестициски циклус и реализација на проекти во повеќе области.
„Во делот на капиталните инвестиции самите граѓани може да направат разлика помеѓу тоа што е денес и тоа што беше во минатото“, нагласи таа.
Димитриеска Кочоска посочи дека низ целата држава се реализираат инфраструктурни проекти, се реконструираат и доградуваат училишта, се инвестира во здравството, а јавните финансии се стабилизираат по долг период на застој и неодговорно управување.
„Денес градиме во инфраструктурата, патиштата се видливи, нешто што последните седум години кај претходната власт немаше никакви движења. Денес имаме реконструкција на училишта, доградби на училишта и инвестиции во здравството. Приоритет беше стабилизирање на јавните финансии, а денес нашиот слоган е ‘Македонија забрзува’“, изјави Димитриеска Кочоска.
Таа нагласи дека најдобар показател за успешноста на економските политики е континуираниот раст на економијата.
„Бруто домашниот производ е најголем доказ за нашето работење и покажува во континуитет раст од над 3 проценти“, потенцираше Димитриеска Кочоска.
Од Струмица, каде ВМРО-ДПМНЕ го одбележува својот 36-ти роденден под мотото „Македонија забрзува, наша обврска“, беше испратена порака дека партијата останува посветена на економскиот развој, инвестициите и подобрувањето на животниот стандард на граѓаните, продолжувајќи ја визијата што пред 36 години ја поставија нејзините основачи и ветерани.
