Намалувањето на цените на горивата треба директно да се одрази врз транспортните трошоци и врз цените на основните прехранбени производи, порача премиерот Христијан Мицкоски.
Регулаторната комисија за енергетика донесе одлука за намалување на цените на нафтените деривати. Според новата одлука, цената на бензинот ЕУРОСУПЕР БС-95 се намалува за 3,5 денари и ќе се продава по 84 денари за литар, додека ЕУРОСУПЕР БС-98 поевтинува за 4 денари и ќе чини 86 денари за литар. Цената на дизелот се намалува за 7 денари по литар и ќе изнесува 80,5 денари, додека екстра лесното масло за домаќинство ќе се продава по максимална цена од 79,5 денари за литар. Намалување бележи и мазутот.
Граѓаните во наредниот период ќе плаќаат значително поевтини горива, откако цената на дизелот е намалена за седум денари по литар, а пониски се и цените на бензините. Владата очекува ова намалување да има директен ефект врз трошоците за транспорт и дистрибуција, а со тоа и врз цените на храната и другите производи од секојдневната потрошувачка.
Премиерот Христијан Мицкоски истакна дека повеќе нема простор за оправдувања од страна на трговците и дистрибутерите кога станува збор за високите цени на храната.
„Кога горивата растеа, тоа беше едно од главните образложенија за поскапувањата. Денес, кога дизелот е поевтин за седум денари, а бензините исто така бележат намалување, логично е граѓаните да очекуваат пониски цени и на производите што секојдневно ги купуваат“, посочи Мицкоски.
Според економските анализи, транспортните трошоци претставуваат значаен дел од крајната цена на многу производи, особено кај прехранбените артикли. Затоа, намалувањето на цените на горивата треба да придонесе за дополнително намалување на инфлаторните притисоци и за подобрување на животниот стандард на граѓаните.
Владата најавува дека внимателно ќе ги следи движењата на пазарот и ќе очекува компаниите да постапат одговорно кон потрошувачите. Од институциите порачуваат дека целта е придобивките од поевтините енергенси и горива да се почувствуваат и во семејните буџети.
Граѓаните со право очекуваат намалувањето на цените на горивата да не остане само бројка на бензинските пумпи, туку да се преслика и во маркетите. Доколку досега високите цени на нафтата беа аргумент за поскапувањата, тогаш сега постои јасна економска логика цените на храната да почнат да се движат во спротивна насока. Владата очекува конкретни резултати, а не нови изговори.
