Македонска Нација
Во време кога Гостивар се соочува со сериозна состојба поради загадувањето на водата за пиење, Фондот на Холокаустот на Евреите од Македонија и Еврејската заедница во Република Македонија денес организираа хуманитарна акција и донираа 10.000 литри флаширана вода за граѓаните и институциите во градот.
Акцијата е израз на солидарност и поддршка кон жителите на Гостивар, кои веќе неколку дена се соочуваат со ограничувања во користењето на водата за пиење, откако надлежните институции издадоа забрана поради сомнеж за загадување на водоводниот систем. Истовремено, здравствените власти регистрираа голем број лица со стомачни тегоби, а истрагата за причините за загадувањето е во тек.
Донацијата беше насочена кон установи и објекти кои секојдневно згрижуваат најранливи категории граѓани, како и кон верски институции што имаат важна улога во локалната заедница.
Флаширана вода беше доставена до:
- „Блу Пазл“ – Служба за функционална процена на деца и млади (деца со аутизам);
- Ресурсниот центар на родители на деца со посебни потреби;
- Дневниот центар за лица со посебни потреби;
- Црквата на плоштадот во Гостивар;
- Пред Саат Џамија;
- Црквата „Св. Петка“
- Пред ЈЗУ Општа болница „Ферид Мурад“
Од Фондот на Холокаустот на Евреите од Македонија и Еврејската заедница истакнуваат дека во моменти на криза најважни се човечката солидарност, меѓусебната помош и грижата за оние на кои поддршката им е најпотребна.
Хуманоста нема националност, вера или етничка припадност. Кога здравјето и животот на луѓето се доведени во прашање, наша обврска е да помогнеме таму каде што помошта е најпотребна.
Се надеваме дека оваа донација малце ќе им олесни на граѓаните и на институциите додека трае надминувањето на состојбата, порачуваат од организаторите на акцијата.
Во услови кога целата гостиварска заедница се соочува со последиците од загадувањето на водата, ваквите гестови на солидарност испраќаат силна порака дека заедништвото и меѓусебната поддршка се најважни токму во најтешките моменти.
