Пратеникот од редовите на ВМРО-ДПМНЕ, Миле Лефков, во гостување во емисијата „Анализа“ на ТВ 24, истакна дека нападите на опозицијата и на Венко Филипче постепено паѓаат во вода, особено по одлуката на Европската комисија Македонија да добие 65,7 милиони евра во рамки на Планот за раст за Западен Балкан и Реформската агенда.
Лефков посочи дека претходната власт, предводена од СДС, со своите политики ја довела државата во ќор-сокак во однос на билатералните прашања и евроинтегративниот процес.
„Сите напади на опозицијата и на Венко Филипче постепено, еден по еден, паѓаат во вода. Не може истиот лидер на опозицијата, кој ѝ честиташе на бугарската влада, да ја напаѓа сопствената влада. Тој истиот денеска подава рака, кога едно билатерално прашање, без консензус и без разговори, стана наш проблем и ќор-сокак во кој, за жал, сме втурнати поради политиките на СДС и оние кои ја водеа надворешната политика“, рече Лефков.
Тој оцени дека понудите од опозицијата се лицемерни и дека позициите на Владата во однос на евроинтегративниот пат се јасни, аргументирани и поддржани од народот.
„Лицемерни се овие понуди и ова навраќање на истата реторика. Патот кон Европската Унија ќе го одиме со реформи, достоинствено и без да дозволиме понижување. Нема да дозволиме повторно да се доживее уште едно национално понижување. Нашите позиции се јасни, добро аргументирани и поддржани од народот. Одбиваме уставни измени без гаранции дека тоа ќе биде последната пречка“, истакна Лефков.
Тој додаде дека најновата финансиска поддршка од Европската комисија е директен демант на тврдењата на опозицијата дека нема напредок во реформите.
„Факт е дека Европската комисија на Македонија ѝ додели 65,7 милиони евра, што е најмногу од сите земји во регионот. За споредба, Србија доби околу 15-16 милиони евра за имплементирање на програмите од Реформската агенда. Тоа е токму истата Реформска агенда за која Венко Филипче и опозицијата тврдеа дека не се случува ништо и дека нема никаков напредок“, рече Лефков.
Со ова, според него, се потврдува дека Владата води политика заснована на реформи, достоинство и заштита на националните интереси, додека критиките на СДС сè повеќе се соочуваат со фактите.
