Македонска Нација
На 23 септември, во Меморијалниот центар на Холокаустот на Евреите од Македонија во Скопје, се одржа второто претставување на документарниот филм „Македонецот“ и изложбата „Мајко мила“, проект на Петро Алексовски. На настанот присуствуваа многубројни посетители, меѓу кои најголемиот дел беа луѓе прогонети како деца од своите домови во Егејска Македонија.
За многумина во салата, прикажаното не беше само сведоштво за минатото. Тоа беше дел од нивниот живот: детството прекинато со прогонство, разделбите со семејствата и споменот на родните огништа.
Петро Алексовски преку филмот и изложбата го исполнува заветот даден на својот татко и брат — нивната приказна, како и судбината на прогонетите деца од Егејска Македонија, да не бидат заборавени.
Пред присутните се обрати и Мане Јаковлески, потпретседател на Управниот одбор на Фондот на Холокаустот на Евреите од Македонија. Тој ја истакна важноста од зачувувањето на личните сведоштва и од пренесувањето на вистината на следните поколенија.
Скопскиот настан следуваше по првото претставување на 22 септември, на кое присуствуваа и претставници на дипломатскиот кор и институциите.
Следната промоција на филмот „Македонецот“ и изложбата „Мајко мила“ ќе се одржи на 24 септември, со почеток во 19:00 часот, во Домот на културата во Охрид.
