На 8 август се испишани значајни страници од политичката, револуционерната, културната и поновата историја на Македонија. Денот ги поврзува Солун, Битола, Леринско, Скопје, Тетово, Прилеп и други македонски краишта.
1903 – Убиен рускиот конзул Александар Ростковски во Битола
На 8 август 1903 година, во екот на Илинденското востание, во Битола бил убиен рускиот императорски конзул Александар Аркадјевич Ростковски. Убиството се случило во близина на денешниот градски парк и предизвикало силна дипломатска реакција на Русија.
Ростковски бил познат како добар познавач на состојбите во Македонија и како критичар на насилствата на османлиските власти. Неговата смрт дополнително го насочила вниманието на европската јавност кон македонското прашање и кон тешката положба на населението за време на востанието.
1908 – Во Солун излегла „Конституциона зарја“
На 8 август 1908 година во Солун бил објавен првиот број на весникот „Конституциона зарја“, орган на Македонската одринска револуционерна организација и гласило на санданистичкото крило на македонското револуционерно движење.
Редактори на весникот биле македонските револуционери Димо Хаџи Димов и Димитар Мирасчиев. Весникот се појавил непосредно по Младотурската револуција, кога дел од македонските дејци се обидувале борбата за слобода и политички права да ја продолжат преку легални средства. „Конституциона зарја“ станала значајна трибина за македонските револуционери и прогресивните сили во периодот од 1908 до 1912 година.
1912 – Роден е Димитар Хаџикиров од Леринско
На 8 август 1912 година во селото Врбени, Леринско, во Егејскиот дел на Македонија, е роден Димитар Христов Хаџикиров.
Хаџикиров бил учесник во партизанското движење и во Граѓанската војна во Грција од 1946 до 1949 година. Како и илјадници други Македонци од Егејска Македонија, по завршувањето на војната бил принуден да го напушти родниот крај. Живеел во Ташкент, а подоцна во Пловдив, каде што починал во 1993 година.
На 8 август 1943 година во Скопје е родена Есма Реџепова-Теодосиевска, една од најпознатите македонски музички уметници и хуманисти.
Со својот препознатлив глас и со повеќедецениската кариера, Есма ја претставуваше Македонија на концертните сцени низ светот. Беше нарекувана „Кралица на ромската музика“, но нејзиното дело одамна ги надмина етничките и државните граници. Таа беше и голем хуманист, посветена на помагањето на децата и на луѓето од ранливите категории.
Во 2013 година ја доби титулата национален уметник на Република Македонија. Почина на 11 декември 2016 година во Скопје.
1944 – Формиран Третиот тетовски партизански одред
На 8 август 1944 година во кумановското село Рамно бил формиран Третиот тетовски партизански одред.
Во неговите редови влегле искусни борци од Третата македонска ударна бригада, како и борци од Тетово и Тетовско. Одредот имал повеќенационален состав – во него заедно се бореле Македонци, Албанци, Срби, Роми и Турци.
По наредба на Главниот штаб на Народноослободителната војска и партизанските одреди на Македонија, одредот бил испратен во западниот дел на земјата, каде што учествувал во борбите за конечното ослободување на Македонија.
1974 – Починал пејачот Кирил Манчевски
На 8 август 1974 година починал Кирил Манчевски, истакнат интерпретатор на македонската градска и лирска народна песна.
Роден во Броштица, Дебарско, Манчевски се вбројува меѓу великаните на македонската староградска музика. Неговиот репертоар го сочинувале лирски, печалбарски и патриотски песни, кои ги изведувал со препознатливи мелодиски украси и длабока емоција. Со неговата прерана смрт Македонија загубила еден од најавтентичните чувари на своето музичко наследство.
1993 – Починал академик Димитар Кондовски
На 8 август 1993 година починал Димитар Кондовски, еден од најзначајните македонски сликари на XX век.
Кондовски бил сликар, графичар, илустратор, сценограф, дизајнер, ликовен критичар и професор. Бил член на уметничките групи „Денес“ и „Мугри“ и дописен член на Македонската академија на науките и уметностите.
Неговото творештво, препознатливо по геометриските композиции, богатата орнаментика и влијанијата од македонското средновековно сликарство, има особено значење за развојот на современата македонска ликовна уметност.
2001 – Карпалак: десет прилепски резервисти ги положија животите за Македонија
На 8 август 2001 година, кај месноста Карпалак на патот Скопје – Тетово, во заседа бил нападнат конвој на Армијата на Република Македонија.
Во нападот загинале десет припадници на резервниот состав на Армијата, сите од Прилеп и Прилепско:
- Нане Наумоски
- Бранко Секулоски
- Љубе Грујоски
- Горан Миноски
- Ердован Шабаноски
- Веби Рушитоски
- Зоран Карески
- Роберт Петковски
- Дарко Вељаноски
- Марко Деспотоски
Конвојот се движел од Прилеп кон Тетово кога бил нападнат со автоматско оружје, тешки митралези и рачни ракетни фрлачи. Покрај десеттемина загинати, повеќе македонски војници биле ранети.
Карпалак останува една од најболните страници од поновата македонска историја. Споменот на десеттемина прилепски бранители е трајно вграден во колективната меморија на Македонија.
Вечна им слава на македонските бранители и на сите борци кои животот го положиле за слободна Македонија!
