Македонија е подготвена да разговара со Бугарија сè додека не се најде заеднички прифатливо решение, но во разговорите треба да биде вклучена и Европската Унија, изјави премиерот Христијан Мицкоски во интервју за МРТ од Њујорк.
Премиерот Христијан Мицкоски вели дека Владата ја користи секоја можност пред меѓународните партнери да ги претстави аргументите и позициите на Македонија во однос на европската интеграција.
Прашан што може да се очекува од Соединетите Американски Држави како стратешки партнер, тој рече дека не може да зборува за нивната идна улога, но дека за Владата е важно македонските аргументи да бидат слушнати.
Мицкоски остро ја критикуваше надворешната политика на претходната влада. Според него, во времето на СДСМ иало само климање со глава, имало коленичење, имало виткање кичма“, додека претставниците на ДУИ, како што рече, не покажувале интерес за одбрана на државните и националните позиции.
Говорејќи за односите со Софија, премиерот посочи дека досегашните билатерални средби не донеле суштински напредок. Тој тврди дека по нив двете страни различно ја претставувале содржината на разговорите. Затоа, според него, присуството на претставници на ЕУ би овозможило да се слушнат аргументите на двете страни.
„Ние во суштина навистина имаме билатерален спор“, рече Мицкоски, додавајќи дека токму затоа е потребен дијалог. Тој оцени дека Софија не сака разговори во присуство на трет партнер бидејќи тоа би значело признавање на билатералниот карактер на спорот.
Премиерот нагласи дека Владата е подготвена да разговара колку што е потребно за да се дојде до решение. Воедно, рече дека нема да прифати процес во кој Македонија би презела обврски без јасна претстава за неговиот исход и со можност во подоцнежните фази да се појавуваат нови барања.
Според Мицкоски, партнерството на двете земји во НАТО треба да биде основа за конструктивен пристап и кон европската интеграција на Македонија.
„Ќе разговараме сè додека не најдеме решение.
Тоа е демократијата.
Тоа е современиот свет“, порача премиерот во интервјуто за МРТ од Њујорк.
