Македонска Нација
На ВМРО-ДПМНЕ можеби ѝ одговара Венко Филипче да остане претседател на СДС. Но на граѓаните и на Македонија не им одговара опозиција која на секоја критика одговара со навреди наместо со идеи.
За раководството на чело со Филипче, се чини, секој разговор надвор од партиските рамки е закана. Секој што ќе ја оспори насоката во која се движи партијата се прогласува за инструмент на Христијан Мицкоски.
Со такви зборови не се одговара на прашањето што сè погласно се поставува: зошто СДС не успева да ги увери граѓаните дека може да биде сериозна и одговорна опозиција?
На секоја власт ѝ е полесно кога наспроти себе има поделена опозиција без јасна програма и убедливо лидерство. Токму затоа СДС треба сериозно да се запраша зошто се појавуваат иницијативи за поинакво организирање на опозицискиот простор. Одговорот не може вечно да биде дека виновни се другите. Не може секое несогласување да биде заговор, ниту секој поранешен сопартиец што бара промена да биде прогласен за предавник.
Македонија има потреба од власт што ќе одговара за своите одлуки и од опозиција што ќе ја контролира со аргументи, предлози и доследна работа. На граѓаните им треба вистинска политичка конкуренција, а не јавна расправа сведена на меѓусебни навреди.
На Македонија не ѝ е потребна опозиција која, на чело со Филипче, повеќе ја чува политичката фотелја на Заев отколку што ги брани државните интереси.
Кога нејзините позиции одат во прилог на интересите на соседите, а на штета на Македонија, СДС има обврска да објасни кого претставува.
Ако Филипче сака СДС повторно да ја добие довербата на граѓаните, треба да ја преземе одговорноста за состојбата во партијата и да поднесе оставка. Оставката на Венко Филипче од претседателската функција во СДС би била подобра и за партијата и за иднината на Македонија.
