8 септември 1991 година – Македонија ја избра независноста
На 8 септември 1991 година граѓаните на Република Македонија излегоа на референдум и со огромно мнозинство се изјаснија за самостојна, суверена и независна македонска држава.
Референдумското прашање гласеше:
„Дали сте за суверена и самостојна држава Македонија, со право да стапи во иден сојуз на суверени држави на Југославија?“
На референдумот излегоа 1.132.595 граѓани, односно околу 76 отсто од запишаните избирачи. Од нив, 1.079.308 граѓани гласаа „за“, со што јасно и недвосмислено беше изразена волјата за независна Македонија.
Истата вечер, пред насобраните граѓани на плоштадот „Македонија“ во Скопје, првиот претседател Киро Глигоров го честиташе создавањето на слободна, суверена и самостојна Македонија.
Резултатите од референдумот беа потврдени од Собранието на Република Македонија на 18 септември 1991 година, а на 17 ноември беше донесен и новиот Устав. Оттогаш 8 Септември се одбележува како Ден на независноста на Македонија – еден од најзначајните датуми во поновата македонска историја.
8 септември 1991 година – Македонската дијаспора ја поддржа независноста
Истовремено со референдумот во Македонија, Македонците во дијаспората организираа референдумски изјаснувања и манифестации во повеќе европски и прекуокеански центри.
Особено успешно беше изјаснувањето во Берлин, каде што повеќе од 97 отсто од излезените Македонци гласаа за независна македонска држава. Со собири, декларации и други активности, македонското иселеништво ја изрази својата поддршка за остварувањето на вековниот стремеж за слободна и независна Македонија.
8 септември 1995 година – Семинар за Македонија во Берлин
На 8 септември 1995 година во Берлин се одржа семинар посветен на Република Македонија и нејзината европска иднина. На собирот учествуваа дипломати, политичари, новинари и претставници на македонската дијаспора.
Настанот придонесе за запознавање на германската јавност со положбата на Македонија, нејзините државни интереси и стремежот за меѓународна интеграција.
Честит 8 Септември – Денот на независноста!
Нека е вечна, слободна и горда Република Македонија!
