1933 – Во Софија излегол првиот број на весникот „Македонска правда“
„Македонска правда“ бил весник на македонската емиграција во Бугарија, преку кој биле разгледувани прашања поврзани со положбата на Македонија, македонското ослободително движење и идејата за создавање балканска федерација.
1944 – Загинал Методија Шаторов-Шарло
На 4 септември 1944 година, во сè уште недоволно разјаснети околности кај месноста Милеви Скали, во близина на Пазарџик, загинал Методија Шаторов-Шарло – македонски комунист, антифашист и национален деец.
Шаторов е роден на 10 јануари 1897 година во Прилеп. Како политички секретар на Покраинскиот комитет на Комунистичката партија во Македонија, се залагал македонското движење да има сопствена национална и политичка самостојност. Неговиот живот завршил непосредно пред крајот на Втората светска војна, а прашањето за околностите под кои бил убиен останало предмет на различни толкувања.
1996 – Промовирани новите македонски банкноти
Во Народната банка на Република Македонија биле промовирани новите македонски банкноти со нов дизајн. Тие биле пуштени во оптек на 8 септември 1996 година, на петгодишнината од независноста на Република Македонија.
Банкнотите содржат мотиви од македонското културно, историско и духовно наследство, меѓу кои археолошки предмети, фрески, икони и народни орнаменти.
