Македонска Нација
Премиерот на Република Македонија, Христијан Мицкоски, за време на неговата посета во Кичево одговараше на прашања од новинарите, при што се осврна на реформската агенда, инфраструктурните проекти и поддршката што Владата ја дава за развојот на општините.
„Денеска извршив увид во спортската сала „Јанчица“ во Општина Кичево, каде по настанатите штети од поплавите активно се работи на санација и реконструкција на објектот. По целосното завршување на активностите, салата ќе биде ставена во функција и ќе им биде достапна на граѓаните и младите спортисти“, истакна Мицкоски.
Тој додаде дека бил извршен увид и во реконструкцијата на улицата „Маршал Тито“, како и на улица во село Србица, проекти кои, како што рече, придонесуваат за подобра инфраструктура и поквалитетни услови за живот на граѓаните.
„После долги години застој, гледаме дека почнуваат да се забележуваат првите знаци на развој и во периодот којшто следи ние како Влада ќе продолжиме да го помагаме развојот на Општина Кичево. Продолжуваме посветено да инвестираме во обновата и развојот на локалната инфраструктура“, нагласи премиерот.
Одговарајќи на новинарско прашање за исполнувањето на реформската агенда, Мицкоски потенцираше дека Владата е целосно посветена на реализација на реформите и дека тие не се сведуваат само на уставни измени.
„Реформите не се само промени на Уставот. Ние сме фокусирани на суштинските работи“, изјави Мицкоски.
Тој посочи дека на состанокот со Герт Јан Копман, претставник во рамките на Европската комисија, бил изразен оптимизам дека Македонија ќе успее да ги испорача речиси сите точки од реформската агенда.
„Сите сме оптимисти дека од оние десет можеме девет и пол да испорачаме, а може и десет, буквално така заклучивме, кои се во грејс-период“, рече премиерот.
Според него, дел од реформските процеси зависат и од учеството на опозицијата, особено во однос на Изборниот законик.
„Се надевам дека таму разумот ќе преовладее, дека ќе се вратат во работната група и ќе го усвоиме сите заедно овој реформски закон. Затоа што реформите не се само промени на Уставот“, истакна Мицкоски.
Во својата изјава тој упати и критики кон раководството на СДС, оценувајќи дека реформите треба да се мерат преку конкретни резултати и суштински промени.
„Но, реформите се доказ дали сте за Европа, не е само Бугари во Уставот, туку има уште многу посуштински работи што треба да ги завршиме. Е ние сме фокусирани на суштинските работи“, порача Мицкоски.
