Премиерот Христијан Мицкоски ја оцени одлуката како историски момент за државата и македонската дипломатија, истакнувајќи дека за првпат од осамостојувањето Македонија е избрана во едно од водечките тела на Обединетите нации.
„Ова е огромен успех за државата и за македонската дипломатија. Изборот во ЕКОСОК е потврда дека Македонија може да постигнува резултати кога работи плански, сериозно и со јасна дипломатска цел“, порача Мицкоски.
Тој нагласи дека изборот претставува признание за активната дипломатска политика на државата и за довербата што Македонија ја гради со своите меѓународни партнери.
Премиерот потсети дека во изминатиот период Македонија беше избрана и за членка на Советот за човекови права на Обединетите нации, како и на Извршниот совет на Организацијата за забрана на хемиското оружје, оценувајќи дека членството во ЕКОСОК е логично продолжение на позитивниот тренд на зајакнување на меѓународната позиција на државата.
Според него, целта е Македонија да не биде набљудувач на глобалните процеси, туку активен учесник кој гради партнерства и придонесува во решавањето на прашања од значење за граѓаните и меѓународната заедница.
„Овој успех е резултат на работа, доверба и одговорен пристап. Продолжуваме да ја зајакнуваме позицијата на Македонија, да создаваме нови можности и да покажеме дека со сериозна работа нашата држава може да биде почитуван и активен дел од глобалните процеси“, истакна Мицкоски.
