Делото на Ѓорче Петров останува трајна инспирација за сите генерации, но и обврска денешната Македонија да се гради како силна, достоинствена и просперитетна држава, со институции во кои граѓаните ќе имаат доверба и со иднина во која младите ќе сакаат да останат.
Претседателот на ВМРО-ДПМНЕ, Христијан Мицкоски, во обраќање на настан по повод споменот на Ѓорче Петров, порача дека неговото дело и идеалите за слободна и достоинствена Македонија остануваат трајна инспирација, но и силна обврска за денешните генерации.
Мицкоски истакна дека патриотизмот во денешно време не се докажува само со големи зборови, туку со работа, резултати, развој, инвестиции, реформи, силни институции и подобар живот за граѓаните.
„Денес, кога оддаваме почит на неговиот лик и дело, не се поклонуваме само пред човек кој го вгради својот живот во темелите на историската ВМРО, туку и пред една идеја која останува жива повеќе од еден век. Идејата дека Македонија има право на своја иднина, дека македонскиот народ има право на достоинство, дека слободата има цена, а таа цена секогаш ја плаќаат најхрабрите, најчесните и најпосветените луѓе на своето време“, порача Мицкоски.
Тој нагласи дека Ѓорче Петров не бил само револуционер и организатор, туку и човек на книгата, науката и знаењето. Преку своето капитално дело „Материјали по изучувањето на Македонија“, Ѓорче Петров оставил сведоштво дека љубовта кон татковината се покажува и преку знаење, истражување, разбирање на сопствениот народ и зачувување на неговата историја, култура, географија и идентитет.
„Во исто време, Ѓорче Петров бил човек на книгата, на науката и на знаењето. Неговото капитално дело „Материјали по изучувањето на Македонија“ претставува сведоштво дека љубовта кон татковината не се покажува само со револуционерна борба, туку и преку истражување, преку разбирање на сопствениот народ, преку грижа за неговата историја, култура, географија и идентитет. Тој верувал дека народ кој не се познава себеси тешко може да ја обликува својата иднина, а народ кој ја познава својата историја никогаш не дозволува некој друг да му ја пишува“, истакна Мицкоски.
Мицкоски додаде дека историјата има вистинска вредност само тогаш кога од неа се извлекуваат поуки за иднината.
„Историјата има вредност само тогаш кога знаеме да ги препознаеме поуките што ни ги остава. Ако денес зборуваме само за минатото, а не научиме ништо за иднината, тогаш не сме ја исполниле нашата должност кон оние што ја создавале оваа држава“, посочи тој.
Според Мицкоски, денешната генерација нема задача да создава револуционерни организации и да води ослободителни борби како генерацијата на Ѓорче Петров, но има исто толку важна задача — да изгради држава достојна за нивната жртва.
„Нашата генерација нема задача да создава револуционерни организации и да води ослободителни борби како неговата генерација. Нашата задача е да изградиме држава која ќе биде достојна за нивната жртва. Да изградиме Македонија во која младите ќе сакаат да останат. Македонија во која ќе се отвораат нови фабрики, ќе се градат нови патишта, железници, училишта и болници. Македонија во која институциите ќе бидат силни, правдата ќе биде еднаква за сите, а успехот ќе зависи од трудот, а не од привилегираните“, порача Мицкоски.
Тој потенцираше дека современиот патриотизам значи секоја нова инвестиција, секое ново работно место, секоја реформа што ја прави државата поорганизирана, посилна и поуспешна, како и создавање институции во кои граѓаните ќе имаат доверба.
„Токму затоа нашата борба денес е борба за развој. Борба за силна економија, за нови инвестиции, за подобри плати, за модерно образование, за здравство што ќе биде достапно и квалитетно, за владеење на правото и борба против корупцијата. Борба за Македонија која ќе биде држава на можности, а не држава на изгубени шанси. Тоа е современиот патриотизам“, заклучи Мицкоски.
