Премиерот на Република Македонија, Христијан Мицкоски, во интервју за Атлантскиот совет во Вашингтон зборуваше за визијата на Владата, преземените обврски, стратешкото партнерство со Соединетите Американски Држави и позицијата на Македонија како членка на НАТО.
Мицкоски нагласи дека во политиката, како и во животот, најважно е дадениот збор да има тежина и преземените обврски да бидат исполнети.
„Во политиката, како и во животот, најважно е зборот да има тежина. Кога преземаме обврска, тогаш работиме таа да биде исполнета. Граѓаните заслужуваат искрен пристап, конкретни планови и резултати, а не импровизации и празни ветувања“, порача Мицкоски.
Тој истакна дека Македонија е одговорен и посветен сојузник во НАТО, кој ги исполнува преземените обврски и придонесува кон зајакнувањето на безбедноста и стабилноста.
Во интервјуто Мицкоски посочи дека Владата има конкретен план за исполнување на обврските во рамките на НАТО. Според неговите изјави, планот предвидува до 2035 година издвојувањата за одбраната да достигнат 3,5 проценти, дополнети со 1,5 проценти инвестиции во стратешка инфраструктура, меѓу која автопати, железници и енергетски преносни системи.
Премиерот се осврна и на односите со САД, нагласувајќи дека стратешкото партнерство меѓу Македонија и Соединетите Американски Држави се гради со децении и дека Вашингтон го смета за најсилниот сојузник на земјата.
„Имаме јасен план, имаме определена насока и чекор по чекор работиме за реализација на целите кои ги поставивме за посилна, побезбедна и просперитетна Македонија“, порача Мицкоски.
Интервјуто во Атлантскиот совет се одржа во рамките на посетата на премиерот Мицкоски и владината делегација на Соединетите Американски Држави. Во Вашингтон се предвидени средби со претставници на Сенатот, Конгресот, Стејт департментот, финансиската институција DFC и американски тинк-тенк организации.
