Мицкоски со Каролајн Вик од DFC: Разговори за Чебрен и Галиште, инфраструктура, енергетика и американски инвестиции
Премиерот на Република Македонија, Христијан Мицкоски, во рамките на работната посета на Соединетите Американски Држави оствари значајна средба со Каролајн Вик, главен директор за политики и вршител на должноста главен директор за развој во Американската корпорација за меѓународно финансиско развивање – DFC.
Станува збор за американска развојна финансиска институција со инвестициски капацитет од околу 205 милијарди долари, која претставува еден од инструментите на САД за мобилизирање приватен капитал и поддршка на инвестиции во стратешки сектори ширум светот.
На средбата се разговарало за можностите за продлабочување на економската соработка и за потенцијални инвестиции во Македонија, особено во енергетиката, инфраструктурата, високите технологии и податочните инвестиции.
Посебно внимание било посветено на можноста DFC да учествува во финансирањето на големите енергетски проекти „Чебрен“ и „Галиште“.
Мицкоски, во интервју за МИА од Вашингтон, појасни дека со Вик било разговарано и за други инфраструктурни и енергетски проекти, како и за можноста за привлекување приватни американски инвестиции во Македонија. Според премиерот, меѓу Владата и DFC е воспоставен канал за натамошна комуникација околу потенцијалните проекти.
Во фокусот на разговорите се и крупните инфраструктурни зафати – гасоводната мрежа, автопатите на Коридорот 8 и Коридорот 10-д, како и железничката инфраструктура на Коридорите 8 и 10.
DFC веќе има ангажман во Македонија преку грант од 5 милиони долари за развој на проектот поврзан со антимонот во Крстов Дол, кај Луке во Кривопаланечко, а Мицкоски оцени дека постои голем интерес за проширување на соработката.
Средбата со Каролајн Вик е дел од серијата разговори што македонската владина делегација ги оствари во Вашингтон со претставници на американските институции, Конгресот, финансиски организации и економскиот сектор, со цел стратешкото партнерство со САД да се прошири и преку конкретни економски и инвестициски проекти.
